НҮБ-аас Хойд Солонгосын эрх баригчид хүн төрөлхтний эсрэг гэмт хэрэг үйлдэж байгааг жишээ баримттайгаар шүүмжилж удирдагч Ким Чен Уныг олон улсын шүүхэд өгөхөө мэдэгдсэн билээ. Швейцарийн Женев хотноо НҮБ-ын Хүний эрхийн зөвлөлийн гишүүд өчигдөр баталж, тус улсад мэдэгдэл хүргүүлсэн юм. Харин БНХАУ-ын Коминнуст намын удирдлагууд энэ мэдээллийг “Санаатайгаар гутаан доромжилсон ямар ч баримтгүй мэдээлэл” хэмээн үгүйсгэж байгаа юм. Хятадын эрх баригчдын энэ үйлдлийг шинжээчид Хойд Солонгост тал зассан хэрэг хэмээн буруутгаж байгаа билээ.

Харин Хятадын гадаад хэргийн сайдын төлөөлөгч Хуа Чунин “Хойд Солонгос дахь хүний эрхийг зөрчсөн үйлдэлд манай улсад ямар ч хамааралгүй. Тэгэхдээ XXI зуунд санаатайгаар нэг улсын нэр хүндийг унагаах нь болчимгүй үйлдэл” гэж мэдэгджээ. Мөн Коминнуст намын дарга Си Жинпин “Хойд Солонгосын эрх баригчдыг буруутгаж байгаа баримт бичиг нь хэн нэгний төсөөллөөс бий болсон худал мэдээлэл учир хүлээн зөвшөөрөх ямар ч боломжгүй. Мэдээж хэрэг олон улсын хууль, хүний эрхийн зарчмыг баримтална” гэж мэдэгджээ.

НҮБ-ын хүний эрхийн шинжээчид “Хойд Солонгост ард иргэдээ ялгаварлан гадуурхаж, өлсгөн тамлаж байгааг баримттайгаар нотолсон хангалттай баримт бий” хэмээн сануулсаар байгаа юм.

Б.Дэлгэрцэцэг