Энэ сарын 8-ны өдөр Куала Лампураас Бээжингийн чиглэлд нисч явсан “МН370” онгоц ор сураггүй алга болсон. Энэ хэрэгтэй холбоотойгоор Малайз улсын Засгийн газар онгоцыг хайх, аврах ажиллагаанд 27 орныг нэгтгэж чадсан юм. Олон хоног үргэлжилсэн аврах ажиллагаа ямар ч үр дүнд хүрээгүй учир тус улсын Ерөнхий сайд Нажиб Разак мэдэгдэл хийж, “МН370” онгоцыг осолдсон гэж үзэж, 11 орны 327 зорчигч, онгоцны 12 гишүүнийг амь үрэгдсэн хэмээн мэдэгдээд “Нажиб Разак миний бие ажлын хариуцлага алдсанаа хүлээн зөвшөөрч огцорч буйгаа зарлаж байна” гэжээ. Малайзын Засгийн газраас “МН370” онгоцонд зорчиж явсан зорчигч тус бүрийн гэр бүлд 50 мянган.ам.долларыг олгохоор болжээ. Уг онгоцонд Хятадын 153, Малайзын 38, Индонезийн 7, Австрийн 6, Энэтхэгийн 5, Францын 4, АНУ-ын 3, Шинэ Зеландын 2, Ираны 2, Канадын 2 иргэн зорчиж явжээ.
Онгоцыг осолдоогүй хэмээн таамаглаж байсан Австралийн Ерөнхий сайд Тони Аббет, Малайзын Засгийн газрын дүгнэлттэй санал нэгдсэнээр 27 орны аврах багаас Австрали улс гарч буйгаа мэдэгдсэн юм. Тэрбээр “Зорчигчдийн гэр бүлийнхэнд эмгэнэл илэрхийлж байна. Бид чадах бүхнээ хийсэн. Энэхүү аврах ажиллагаанд Австрали улс өөрсдийн чин сэтгэлээ харуулсан гэж бодож байна. Өнөөдрөөс эхлэн Малайз гэлтгүй, улс орон бүр аюулаас бага ч гэсэн сэргийлэхийг хүсч, зохион байгуулалттай ажиллахыг хүсье. Тэднийг бурхан өршөөг” гэжээ.
Онгоцыг хайх ажиллагааг гурван хоног хойшлуулсаны улмаас Бээжин хотод байрлах Малайзын элчин сайдын байрны гадна 100 гаруй иргэн үнэн бодит мэдээлэл өгөхийг шаардаж, цагдаагийнхантай мөргөлджээ. Мөн Малайзын Ерөнхий сайдын мэдэгдлийн дараа Куала Лампур хотод олон нийтийг хамарсан эсэргүүцлийн жагсаал болж, хариуцлагагүй ажилласан Засгийн газраа огцрохыг шаардсан байна.
Б.Дэлгэрцэцэг