Казахстаны улсын нийслэл Астана хотод чөлөөт бөхийн Ази тивийн аварга шалгаруулах насанд хүрэгчдийн тэмцээн болж байгаа билээ. Тус тэмцээний  эрэгтэйчүүдийн  97 кг-ын жингийн ангилалд барилдсан үндэсний шигшээ баг, “Ганьт” клубын тамирчин ОУХМ Д.Хүдэрбулга түрүүлж, Азийн аварга болжээ. Тэрбээр үндэсний шигшээ багийн дасгалжуулагч Б.Баяраагийн шавь юм.

Д.Хүдэрбулга алтан медалийн төлөөх барилдааныг Киргизстаны бөх Магомед Мусаевтай хийж, 7:5 онооны харьцаатайгаар ялснаар Азийн аварга болжээ. Ийнхүү ОУХМ Ч.Ганзориг 2006 онд тус улсын Алматы хотод болсон тивийн аварга шалгаруулах тэмцээнээс алт медаль авснаас хойш найман жилийн дараа Д.Хүдэрбулга тивийн аварга болж буй аж.

Мөн эрэгтэйчүүдийн 74 кг-ын жинд алтан медалийн төлөө барилдсан П.Өнөрбат, эмэгтэйчүүдийн 48 кг-ын жинд хүч үзсэн ОУХМ Э.Нарангэрэл нар мөнгөн медаль зүүлээ. Харин “Алдар” спорт хороо, “Ажнай” клубын тамирчин Н.Лхамгармаа 61 кг-ын жинд барилдаж,  хүрэл медалийн тавцанд зогссон.

Б.Буд