“Sewol” хөлгийн сүйрлээс болж Өмнөд Солонгосын Ерөнхий сайд Чон Хон Вон огцрох өргөдлөө өгсөн талаар “yonhapnews.co.kr” мэдээллээ. Ерөнхий сайд өчигдөр Ерөнхийлөгч Пак Ын Хэд энэ тухайгаа мэдэгдсэний дараа, ард түмэндээ хандаж мэдэгдэл хийсэн байна. Тэрбээр мэдэгдэлдээ “Миний хувьд хамгийн зөв зам бол хариуцлагаа өөрөө үүрч, огцрох. Би Ерөнхий сайдынхаа албан тушаалыг өгөх хүсэлгүй байгаа ч гэлээ харамсалтайгаар хорвоог орхисон тэр бяцхан хүүхдүүдийн өмнөөс хариуцлага хүлээх нь зөв гэж үзэж байна. Би ямар ч шийтгэл хүлээхэд бэлэн байна” гэжээ.
1
Өнгөрсөн долоо хоногийн эхээр тус хөлгийн багийн 15 гишүүнийг баривчилсан билээ. Зорчигчийн гэр бүлийнхэн хөлгийн ахмад Ли Жүн Сёктэй уулзахыг хүсч, ямар зорилгоор хөлгийн жолоог өөр хүнд шилжүүлсэн, хөлөг сүйрэхэд хамгийн эхэнд зугтсан шалтгааныг асуухыг хүсч, Чолла мужийн цагдаагийн хэлтсийн өмнө суулт зарласан байна.
Амь үрэгдэгсдийн тоо өнөөдрийн байдлаар 189 хүрсэн бөгөөд өнөөг хүртэл 102 зорчигч сураггүй хэвээр байгаа юм.
1
Б.Дэлгэрцэцэг
Уншиж байна |