Хар тамхи тээвэрлэсэн, хадгалсан хэргээр Баянзүрх дүүргийн шүүх, нийслэлийн давж заалдах шатны шүүхээс 11 жилийн хорих ял сонссон улсын начин Ц.Улаанхүүгийн хэргийг  Дээд шүүхийн эрүүгийн танхимд өчигдөр  хянаж үзээд нэмэлт мөрдөн байцаалтад буцаасан билээ.  Хяналтын шатнаас ямар үндэслэлээр  уг хэргийг буцаасан эсэхийг түүний  өмгөөлөгч Л.Данзанноровоос тодрууллаа. -Ц.Улаанхүү начны хэргийг ямар үндэслэлээр мөрдөн байцаалтад буцаасан юм бэ? - Ц.Улаанхүүд холбогдох хэргийг хяналтын шатнаас байцаан шийтгэх ажиллагаанд зөрчил гарсан  гэх үндэслэлээр  нэмэлт ажиллагаа хийлгэхээр мөрдөн байцаалтад  буцаасан. Мөн мансууруулах  төрлийн эм  бэлдмэл онц их хэмжээгээр хадгалсан  эсэх нь эргэлзээтэй учраас зарим зүйлийг тодруулах шаардлагатай ч  гэж дээд Шүүхээс үзсэн. - Биеийн байдал нь муудсан гэсэн. Батлан даалтад гарах хүсэлт гаргасан уу? - Биеийн байдал нь тааруу. Одоогоор батлан даалтад гаргах хүсэлт шүүхэд гаргаагүй. Дээд шүүхийн тогтоол бичгээр гарсны дараа хүсэлт гаргах эрх нээгдэнэ. Дашрамд дурдахад  Ц.Улаанхүүд холбогдох хэргийн анхан шатны шүүх хурал өнгөрсөн наймдугаар сарын 25-нд болж, Ц.Улаанхүү начин Н.Болдбаатар гэгчид 43 ширхэг /капсул/ мансууруулах төрлийн бэлдмэлийг зарж борлуулах зорилгоор өгсөн болохыг нотлох хангалттай баримт байгаа гэж шүүх бүрэлдэхүүн үзсэн юм. Тиймээс Эрүүгийн хуулийн 192.3-1 дэх хэсэгт зааснаар Ц.Улаанхүү нь мансууруулах, сэтгэцэд нөлөөлөх онц их хэмжээний бэлдмэлийг олж авсан, хадгалсан, борлуулсан  нь тогтоогдсон тул 11 жилийн хорих ялаар шийтгэх, хорих ялыг чанга дэглэмтэй хорих ангид эдлүүлэх, хураан авсан 523 грамм мансууруулах бодисыг устгах, батлан даалтад  гарахдаа  төлсөн гурван сая төгрөгийг буцаан олгох шийдвэр гарч байв. Н.Түвшин