Л.Гүндалай Үндэсний мэдээллийн төвд мэдээлэл хийлээ. Тэрбээр Их өөрчлөлт, Их үйлсийг хамтдаа бүтээе уриатай “Ард түмнээ хайрлая” нэртэй нам байгуулахаар гишүүд элсүүлж буй талаараа мэдээлэв. Л.Гүндалай 2016 оны УИХ-ын сонгуульд Эрдэнэт хотоос нэр дэвшихээр зэхэж буй гэнэ. Тиймээс намынхаа анхны гишүүдийг Эрдэнэт хотоос элсүүлжээ. Тус хотын Амарын гудамжинд долоон цаг сууж, “Ард түмнээ хайрлая” намдаа 400 гишүүн элсүүлж, намын үнэмлэхээ гардуулсан байна. Маргааш тэрбээр Дархан хотод ажиллах бөгөөд багадаа 800 хүнийг гишүүнээр элсүүлнэ гэж мэдээлэв. Шинээр байгуулагдаж буй улс төрийн нам 801 гишүүнтэй байх ёстой ч Л.Гүндалай намдаа 3000 хүнийг элсүүлнэ гэдэгтэй итгэлтэй байгаа гэнэ.
Хэвлэлийн хурлын үеэр түүнээс зарим зүйлийг тодрууллаа.
-Та бол АН-ын гишүүн. Яагаад шинэ нам байгуулах болов?
-Би АН-аас гарах өргөдлөө 10-аад хоногийн өмнө Л.Эрхэмбаярт өгсөн. Одоогоор намаас гарсан тодорхойлолтыг маань өгөөгүй байна. Монголчууд эрх баригчдад итгэл алдарсан. Гуравхан сая хүнийг сайхан амьдруулж чадахгүй байна шүү. Тиймээс л шинэ хүчин, шинэ бодлого хэрэгтэй.
-Намаа хэзээ бүртгүүлэх вэ?
-Ирэх долоо хоногт намын их хурлаа хийнэ. Энэ хурлаар намын мөрийн хөтөлбөр, дүрэм, далбаа, бэлгэдлээ батална. Тэгээд энэ сарын дундуур Дээд шүүхэд намын материалаа өгнө. Дээд шүүх хуулийн хугацаанд шийдвэрлэж, тавдугаар сарын дундуур гэхэд манай нам хууль ёсоор байгуулагдчих байх.
-Таны нам ямар үзэл баримтлалтай байх вэ?
-Нийгмийн баримжаатай зах зээлийн эдийн засгийн бодлогыг явуулна. Товчхондоо Германы замаар явна гэж ойлгож болно. Нийгмийн баримжааг чухалчилна. Өнөөгийнх шиг зэрлэг капитализмын замаар явахгүй.
-Яагаад Эрдэнэт хотыг сонгов? Хөвсгөлийнхөн танаас “уйдсан” гэж үзэв үү?
-Би Хөвсгөлд нэр дэвшиж болно. Тэнд миний нэр хүнд унаагүй. Манай Хөвсгөл хол, сумд нь хоорондоо зайтай, бартаа ихтэй. Тиймээс Улаанбаатартай ойрхноор нь Эрдэнэтийг сонгосон.
-Та УИХ-ын гишүүн С.Ганбаатарыг намдаа элсэхийг хүссэн гэх мэдээлэл үнэн үү?
-Би С.Ганбаатарыг гуйгаагүй. Ер нь хэнийг ч гуйхгүй.
-Та өмнө нь Ард түмний намыг байгуулж байсан. Гэвч намаа “хаяж”, АН-д орсон. Шинээр байгуулж буй нам чинь энэ замаар явахгүй гэсэн баталгаа байна уу?
-Би Ард түмний намыг 2005 онд байгуулж байсан. Харин одоо бол надад хамааралгүй. Би 10 жилийн өмнөхөөс их өөрчлөгдсөн. Улс төрийн нөхцөл байдалд ч өөр байна.
Тэрбээр Орхон аймагт шилжиж очсон бөгөөд тэнд газар авч, шавыг нь тавиад буйгаа хэвлэлийн хурлын үеэр хэлж байв.
В.Бат