Төрийн албан хаагчдын цалинг гурван үе шатлалтайгаар нэмэгдүүлэхээр болжээ.
Энэ онд цалин тэтгэвэрийг нэмэх зорилгоор 130 тэрбум төгрөгийг улсын төсөвт суулгасан байдаг. Үүнтэй холбогдуулан өнгөрөгч сар шинийн баярын өмнө өндөр настаны тэтгэвэрийг нэмэгдүүлээд байсан юм.
Тэгвэл ирэх тавдугаар сарын 1-нээс Төрийн үйлчилгээний албан хаагчдын цалинг нэмэгдүүлэхээр болжээ. Мөн ирэх долоодугаар сараас эхлэн Төрийн тусгай албан хаагчдын цалинг нэмэгдүүлэх бол аравдугаар сарын 1-нээс эхлэн Төрийн удирдах албаны ажилтнуудын цалинг нэмэгдүүлэхээр болсон байна.
Уг шийдвэрийг Хөдөлмөр нийгмийн зөрчлийн гурван талт хэлэлцээрээр баталжээ.
Энэ талаар МҮЭХ-ны ерөнхийлөгч Х.Амгаланбаатараас тодруулахад "Боловсрол, эрүүл мэнд, соёл урлаг, үйлчилгээний салбарт хамаарагддаг албан хаагчдын цалин ирэх тавдугаар сарын 1-нээс ижил мөнгөн дүнгээр нэмэгдэнэ. Өөрөөр хэлбэл, цалингын хэмжээ нэг мөнгөн дүнгээр нэмэгдэнэ гэсэн үг. Харин хэдэн хувиар нэмэгдэв гэдгийг албан хаагч өөрөө л зөвхөн мэдэх боломжтой" гэв.
Албаны эх сурвалжийн мэдээлж буйгаар Төрийн албан хаагчын дундаж цалин 570 мянган төгрөг байгаа гэнэ. Харин дээрх шатлалаар цалин нэмснээр дундаж цалин 630 мянган төгрөг болно хэмээх судалгааг гаргажээ.
Б.Дэжид