МАН-ын Ерөнхий нарийн бичгийн дарга Ж.Мөнхбат, НИТХ-ын төлөөлөгч Г.Ганбаяр нар өнөөдөр мэдээлэл хийлээ.

Мэдээллийн эхэнд Г.Ганбаяр “УИХ-ын хаврын чуулганаар сонгуулийн тогтолцооны асуудлыг хэлэлцэнэ. Үүнтэй холбогдуулан МАН-ын удирдах зөвлөлийн хуралдаж сонгуулийг ямар системээр явуулахыг ард иргэдээс санал асуулгаар авах шийдвэрийг гаргасан. Түүнчлэн, УИХ-д ард нийтийн санал асуулга явуулах тухай УИХ-ын тогтоолын төслийг МАН өргөн барьсан. Гэтэл сүүлийн хэд хоног хэвлэл мэдээлэл, олон нийтийн хэрэгслээр "МАН байр суурьнаасаа ухарлаа", "МАН ард түмний нэрийг барьж шоудлаа" гэх мэт “мессеж”-ийг олон түмэнд хүргээд байгаа юм. Тиймээс өнөөдөр энэхүү хэвлэлийн хурлыг МАН-ын зүгээс хийж байна” гэв.
 

Харин МАН-ын Ерөнхий нарийн бичгийн дарга Ж.Мөнхбат “Манай намын зүгээс сонгуулийг ямар системээр явуулахыг ард иргэдийн санал асуулга авах шийдвэрийг гаргасан байгаа. Уг шийдвэрийг гаргахаас өмнө бид хөдөө орон нутгийн иргэд, сонгогч түмэнтэй уулзалт хийсэн. Уулзсан, ярилцсан иргэн бүхэн намын жагсаалтаар сонгогддог асуудлыг дэмжихгүй байгаагаа илэрхийлж байсан.

Бид энэ асуудалд судалгааны байгууллагаар судалгаа хийлгэхэд, иргэдийн 93 хувь нь "намын нэрийн жагсаалтаар сонгогддог системийг тохирохгүй байна" гэсэн. Тиймээс иргэдийн санал хүсэлт дээр тулгуурлан УИХ-д ард нийтийн санал асуулга явуулах тухай УИХ-ын тогтоолын төслийг өргөн барьсан. Түүнээс биш бид ямар нэг байдлаар сонгуулийн шоу хийгээгүй гэдгийг албан ёсоор мэдэгдэж байна” гэсэн юм.

Түүнчлэн, тэд сонгуулийн тогтолцооны асуудалд ард түмний санал асуулга явуулах хэрэгтэй гэдэг байр суурин дээрээ байгаа гэдгийг илэрхийлсэн юм. Мөн бүх нийтийн санал асуулга явуулахдаа хамгийн бага зардлаар буюу 1-2 тэрбум төгрөгөөр хийх боломжтой. Бүх ард түмэнд санал асуулга явуулах асуудлыг УИХ-ын дарга ганцаараа шийддэг юм биш. Үүнийг УИХ-ын чуулганаар хэлэлцэж шийдэх ёстой асуудал гэдгийг онцоллоо.

Б.Дэжид