Оюутолгойн далд уурхайн бүтээн байгуулалт, санхүүжилтийн төлөвлөгөөг баталж, гарын үсэг зурах ёслол болсныг Рио Тинтогийн албан ёсны сайтад мэдээлжээ. Энэхүү ёслол Дубай хотноо болсон бөгөөд тус улсад айлчилж буй Монгол Улсын Ерөнхий сайд Ч.Сайханбилэг оролцсон байна. Ингэснээр Оюутолгойн хоёр дахь шатны хөрөнгө оруулалт шийдэгдэж, бүтээн байгуулалтын ажил эхлэх боломжтой болж буй юм.
Оюу Толгойн далд уурхайн бүтээн байгуулалтыг үргэлжлүүлэхээр боллоо
Монгол Улс дахь “Оюу толгой” компани “Туркойз Хилл Ресурс” болон “Рио Тинто” компаниуд Оюу Толгойн далд уурхайн бүтээн байгуулалтыг үргэлжлүүлэхээр болж, гэрээнд гарын үсэг зурсан тухай “www.riotinto.com” мэдээллээ. “Оюу толгой” компанийн хувьцаа эзэмшигчид шийдвэрлэгдээгүй орхигдсон асуудлуудаа эцэслэн тохиролцож, далд уурхайн бүтээн байгуулалтыг санхүүжүүлэх үндсэн зарчмуудыг тусгасан гэрээнд гарын үсэг зурцгаасан байна. Монгол Улсын Ерөнхий сайд Ч.Сайханбилэг “Монголын эдийн засаг сэргэж эхэллээ” гэж хэлжээ. “Оюу толгой” компанийн цаашдын хөгжил Монголын эдийн засагт ихээхэн ач холбогдолтой билээ. Нэг нэгэндээ харилцан итгэлцэх нь Монгол Улсын хөгжилд хувь нэмэртэй бөгөөд урт хугацааны үүрэг амлалтад дээр суурилсан ажил хэрэгч суурийг дахин тогтооно. Оюу Толгойн далд уурхайн бүтээн байгуулалт Монголын ард түмэн болон эдийн засагт тусаа өгөх болно. “Монгол Улс бизнес хийхэд таатай орон” гэж гэрээнд гарын үсэг зурсан талууд онцолжээ. “Рио Тинто” компанийн Зэс, нүүрсний группийн гүйцэтгэх захирал Жан-Себастиан Жак “Бидний хамтарсан мэдэгдэл ихээхэн үнэ цэнэтэй билээ. Оюу Толгойн далд уурхайн бүтээн байгуулалтыг үргэлжлүүлэхээр болсон нь хөгжлийг үргэлжлүүлэн явуулах үндэс суурийг тавьж өглөө” гэж мэдэгджээ. 2009 онд гарын үсэг зурсан “Хөрөнгө оруулалт”-ын гэрээний нөхцлийг сайжруулж, ирээдүйд тодорхой, тогтвортой орчинг хангахаар болжээ.
“Туркойз Хилл Ресурс” компанийн гүйцэтгэх захирал Жефри Тугесен “Энэ гэрээнд гарын үсэг зурах нь өнгөрсөн жилийн хугацаанд “Оюу Толгой” компанид хийсэн хамгийн үр дүнтэй ажил боллоо” гэж хэлжээ. Гэрээний дагуу далд уурхайн хөгжлийг дахин эрхлүүлэх замыг тодорхойлж, уул уурхайн стандарт болон ажлын байр, эдийн засагт хувь нэмэр оруулахаас гадна туршлага олгох болно.
Далд уурхайн буюу 2 дугаар үе шатны бүтээн байгуулалтын ажил өнгөрсөн 2013 оны наймдугаар сарын 12-ны өдрөөс эхлэн түр зогсонги байдалд ороод байсан юм. “Оюу толгойн” ордын нийт үнэ цэнийн 80 хувь нь далд уурхайд бий. 2015 оны эхнээс өнөөдрийг хүртэл "Оюу толгой" компани Монгол Улсад татвар, хураамж, болон ашигт малтмалын нөөц ашигласны төлбөрт нийтдээ 78.5 сая ам.доллар төлөөд байна. (Үүнд 20 сая ам.долларын урьдчилгаа төлбөрийг оруулж тооцсон болно)
Б.Дэлгэрцэцэг