Монголын Засгийн газар, “Туркойз Хилл Ресурс” болон “Рио Тинто” компанийн удирдлагууд Оюу Толгойн далд уурхайн бүтээн байгуулалтыг үргэлжлүүлэхээр болж, гэрээнд гарын үсэг зурсан билээ.  Олон улсын анхаарлын татаад буй тус гэрээний талаар гадны хэвлэлүүд хэрхэн мэдээлснийг сонирхуулж байна.

“Оюу толгой” зогсонги байдлаас гарлаа

Австралийн “www.theaustralian.com.au” сайт.

2013 оны есдүгээр сараас хойш зогсонги байдалд ороод байсан Монголын “Оюутолгой” компанийн зэс, алтны олборлолтын асуудал өчигдөр шийдвэрлэгдсэн байна. Учир нь “Оюутолгой” компани “Туркойз Хилл Ресурс” болон “Рио Тинто” компаниуд Оюутолгойн далд уурхайн бүтээн байгуулалтыг үргэлжлүүлэх гэрээнд гарын үсэг зурсан бөгөөд харилцан нэг нэгэндээ итгэл хүлээлгэхээр боллоо. “Рио Тинто” компанийн удирдлагуудын мэдэгдснээр “Оюу толгой” гацаанаас гарах нь Монголын эдийн засагт тустай” гэжээ. Монгол Улсын Засгийн газар “Оюутолгой” компанийн 34 хувийн эзэмшдэг бол “Рио Тинто” 66 хувийн эзэмшдэг билээ. Энэхүү гэрээ Монголын эдийн засгийг өргөх тустай гэрээ болсныг “Рио Тинто”-гийн удирдлагууд онцолсон байна.  “Рио Тинто” компанийн Зэс, нүүрсний группийн гүйцэтгэх захирал Жан-Себастиан Жак “Гэрээний дагуу бид нэг нэгэндээ итгэл хүлээлгэх учиртай” гэж хэлжээ.  Монгол Улсын Ерөнхий сайд Ч.Сайханбилэг “Энэхүү гэрээ Монгол бизнес хийхэд нээлттэй улс гэдгийг олон улсад баталсан хэрэг боллоо” гэсэн байна.  Оюутолгойн далд уурхайн бүтээн байгуулалтыг үргэлжлүүлэх гэрээ хэрэгжиж эхэлснээр олон улсын 14 банк Монголд 4.2 тэрбум ам.долларын хөрөнгө оруулалт хийхээр болсон юм.

Оюу толгойн асуудал шийдэгдэж эхэллээ

Америкийн “www.marketwatch.com” сайт

“Рио Тинто” компани Монгол дахь Оюутолгойн далд уурхайн бүтээн байгуулалтыг үргэлжлүүлэх гэрээнд гарын үсэг зурлаа.  Гэрээнд гарын үсэг зурах ёслолд  “Рио Тинто” компани болон Монголын Засгийн газар, “Туркойз Хилл Ресурс” компанийн удирдлагууд оролцсон юм. Талууд гэрээ байгуулснаар гацаанд ороод буй “Оюутолгой” компанийн асуудал шийдэгдэж байна. “Рио Тинто” компани “Энэхүү гэрээ цаг үеэ мэдэрсэн чухал гэрээ боллоо” хэмээн онцолжээ. Далд уурхайн хөгжлийн талаар тохиролцсон учир одоо  төслийн санхүүжилт, техник, эдийн засгийн судалгааг эцэслэн шийдвэрлэх учиртай хэмээн “Рио Тинто” компаниас мэдээлжээ.

Монголын эдийн засаг сэргэнэ

“Ройтерс” агентлаг

“Оюутолгой” компани “Рио Тинто”, “Туркойз Хилл Ресурс” компанитай далд уурхайн бүтээн байгуулалтыг үргэлжлүүлэх гэрээнд гарын үсэг зурсан тухай “Рио Тинто” компани мэдээллээ. Оюутолгойн далд уурхайн төсөл татвар болон бусад маргааны улмаас хоёр жил гацаанд байсан юм. Монголын Засгийн газар “Туркойз Хилл” ба “Рио-Тинто” компанийн хувьцаа эзэмших болон төслийн санхүүжилтийн үндсэн асуудалд тохиролцоонд хүрсэн хэмээн албаныхан мэдээллээ. Бүтээн байгуулалтын ажил эхлэхээс өмнө “Рио Тинто” төслийн санхүүжилтыг эцэслэх шийдвэрлэхээр тохиролцжээ. Монгол Улсын Ерөнхий сайд Ч.Сайханбилэг “Оюутолгой” бол дэлхийн хэмжээний зэс-алтны орд юм. Үүнийг цааш хөгжүүлэх нь Монгол Улсын эдийн засагт чухал нөлөөтэй. Цаашдын хамтын ажиллагаа, харилцаа холбоогоо өргөжүүлэн бэхжүүлэх асуудлаар түншүүдтэйгээ эцсийн тохиролцоонд хүрч чадлаа. Бид баяртай байна. Энэ нь харилцан итгэлцэл, Монголын ирээдүйн хөгжилд тулгуурласан шинэ, бүтээлч харилцааны үндэс суурийг баталгаажуулж өгч байна” гэж мэдэгджээ.

Б.Дэлгэрцэцэг