УИХ-ын гишүүн С.Ганбаатар Оюутолгойн гэрээний талаар мэдээлэл хийлээ. Тэрбээр “2048 он хүртэл Монгол Улс Оюутолгойгоос ямар ч ашиг, татвар авахгүй. Үг дуугүй бууж өгөх аймшигтай гэрээнд гарын үсэг зурсан байна” хэмээн ярив.
Мөн тэрбээр “Энэхүү үл ойлгогдох байдлаар гарын үсэг зурсан баримт бичиг нь Монгол Улсад хор уршиг тарихаар байна. Үүний цаана Монгол Улс ойролцоо тооцоогоор 6 тэрбум ам.долларын хохирол хүлээх болж байна. Ер нь гэрээгээ биелүүлэхгүй байгаа талын санхүүгийн тайланг хүлээн зөвшөөрөх нь Засгийн газрын засашгүй алдаа болно. Гэрээ батлагдсанаар хөрөнгө оруулалт нэртэй өндөр хүүтэй зээл авч, зээл, зээлийн хүүгийн зардал өсч Оюутолгой төслөөс монголын талын авах ногдол, авах ашиг 2048 оныг хүртэл 0 хувь болох бөгөөд татвар ногдох орлого буурна. Үндсэндээ 8.1 тэрбум ам.долларын зээлийн өр, барьцаанд Монгол Улсын газар нутаг, ашигт малтмалын орд тавигдах эрсдэл учрахаар байна” гэв. Тиймээс энэ асуудлыг УИХ-ын чуулганы нэгдсэн хуралдаанаар хэлэлцэх шаардлагатай гэж мэдэгдлээ.