УИХ-ын чуулганы үдээс хойшхи хуралдаан үргэлжилж байна. Чуулганы хуралдаанд Монгол Улсын Ерөнхий сайд оролцож “Оюутолгой”-н далд уурхайн бүтээн байгуулалтын ажлыг үргэлжлүүлэх төлөвлөгөөнд гарын үсэг зурсантай холбогдуулан мэдээлэл хийлээ. Тэрбээр:
-Хувь нийлүүлэгчдийн асуудлыг шийдвэрлэж, нэмэлт санхүүжилтийг шийдвэрлэх замаар “Оюутолгой”-н далд уурхайн төлөвлөгөөнд гарын үсэг зурлаа. Хөрөнгө оруулалтаар нийтдээ 6 тэрбум ам.доллар орох юм. Далд уурхайн үйл ажиллагааг үргэлжлүүлэх төлөвлөгөөнд гарын үсэг зурснаар манайд ашигтайгаар шийдэгдсэн хэд хэдэн зүйлийг онцолъё.
1.2009 оны хөрөнгө оруулалтын гэрээг хөндөх асуудлыг аль аль талаасаа тавигдаагүй. Далд уурхайг эхлүүлэх үндсэн асуудлаа ярилцахдаа 2009 оны гэрээг үндэслэж явсан. Монголын талын 34 хувийг баталгаажуулсан.
2.Удирдлагын менежментийн зардлыг 6 хувиар тогтоосон байсан. Далд уурхайн бүтээн байгууллалтын үйл явц үргэлжлэх 7 жилийн хугацаанд үүнийг 3 хувь болгосон. Ингэснээр жил бүр дор хаяж, 10 сая ам.доллар орж ирэх ба хамгийн багаар тооцоход 1 тэрбум төгрөг манайд орж ирэх юм. 8 сая ам.долларын хөрөнгө оруулалтыг баталгаажуулсан.
3.Бүх зардлыг Монголын тал хянах бололцоотой боллоо. Хоёр талаас тус бүр 2 хүний бүрэлдэхүүнтэй ажлын хэсэг байгуулаад монголын талын хүн ахлаад цаашид Оюутолгой дээр хийх бүх зардалд Монголын Засгийн газар хяналтаа тавих боломжтой болсон.
4.Анх яригдсан Монголын тал 53, Рио тинтой 43 хувийг авна гэх зарчим баримт бичигт тусгагдаагүй байсан. Харин далд уурхайг эхлүүлэх төлөвлөгөөндөө энэ заалтыг албан ёсоор тусгасан байна.Энэ төсөл дээр гадны томоохон зөвлөх компанийг авч ажиллуулахгүй байна гэж шүүмжилж байсан. Тиймээс томоохон хуулийн болон санхүүгийн зөвлөх компани авч ажиллуулсан. Үүний үндсэн дээр хоёр талын бүх тоо, тооцоо нэг болсон. Ингэсний дүнд Монголын талын авах байсан 53 хувь 54.9 болж тохиролцоо хийсэн.
5.Татварын асуудал маргаан дэгдээсэн байсан. Манай тал 30 сая долларын татвараа аваад, цаашид ямар нэгэн маргаангүй явахаар тохирсон. Гэрээний дагуу, Монгол Улсын хуулиудын хүрээнд нэг мөр асуудлыг шийдсэн.
6.Төслийн санхүүжилтээр хийгдэх ажлын хүрээнд жил бүр 9 тэрбум ам.долларын нэмэлт хөрөнгө оруулалт орно.
7.Өмнөговь аймагтай бүтээн байгуулалтын гэрээ байгуулсан.
8.Монголын талын хяналтыг нэмэгдүүлсэн.
9..Энэ гэрээг баталгаажуулсны дараа 30 хоногийн дотор Тавантолгойн цахилгаан станцын хөрөнгө оруулагчдад боломж гаргах нөхцөл бүрдүүлсэн.
10.2015 оны 9 сар гэхэд Зэс хайлуулах үйлдвэрийг ашиглалт оруулах юм.
Монгол Улсын Ерөнхий сайд хууль тогтоомжийн дагуу “Оюутолгой”-н гэрээний төсөлд гарын үсэг зурах удирдамжийг албаны хүмүүст өгсөн хэмээлээ. Ерөнхий сайд мэдээлэл хийснийхээ дараа гишүүдийн асуултад хариулж байна.
УИХ-ын гишүүн Л.Энх-Амгалан:
-Хөрөнгө оруулалтын гэрээнд өөрчлөлт орсон уу? Яагаад Дубайд гарын үсэг зурсан бэ?
-Хуулийн хугацаанд хариулах боломж байгаагүй. Хэлэлцээ явагдаж байх үед УИХ дээр мэдээлэл хийж болохгүй байлаа. Хөрөнгө оруулалтын гэрээнд өөрчлөлт ороогүй. Маргааны асуудлаа нэг тийш нь шийдсэн. Гарсан зардлын хэтрэлт зүйл анги бүрээр нь хэлэлцэн 1.2 тэрбум ам.доллар дээр тогтсон. Санхүүгийн байгууллагаас босох 4.2 тэрбум төгрөг далд уурхайн үйл ажиллагаанд зарцуулагдаад явна. Хэлэлцээ сүүлийн 3 сар идэвхтэй явсан. Улаанбаатар, Өмнөговь аймаг, Лондон, Дубайд хэлэлцээр хийсэн. Ингээд сүүлийн үр дүндээ хүрсэн. Дубай өөрөө олон улсын санхүүгийн том хот. Тийм учраас би Дубайд гарын үсэг зурагдсан нь олон улсын анхааралд хүрсэн гэж бодож байна.
УИХ-ын гишүүн О.Баасанхүү:
-Монголын өглөөний 05 цагт, Арабын 01 цагт гарын үсэг зурсан байна. Энэ төлөвлөгөөгөөр далд уурхайн ТЭЗҮ-ийг баталсан уу. Энэ төлөвлөгөө Арбитрийн шүүхэд барим болох уу? Ерөнхий сайд та биднийг доромжилж байна. ҮАБЗ-өөр таныг айлчлах зөвшөөрөл авсан уу?
-Монгол Улсын Ерөнхий сайдыг доромжлоод яах вэ? Та өөрийгөө доромжилж байна гэсэн үг. Сайханбилэгийг доромжилж болно. Оюутолгой цаашдаа улс төрийн харьцааны асуудал биш эдийн засгийн асуудал болно гэдгийг зарчмын хувьд дахин дахин хэлмээр байгаа юм. ҮАБЗ-өөр АНЭУ-д айлчлал хийх зүйл батлагдсан. Би “Оюутолгой”-н гэрээнд гарын үсэг зурах гэж яваагүй. Би айлчлалаараа АНЭУ-ын дэд Ерөнхийлөгч бөгөөд Ерөнхий сайдтай уулзаж, хоёр улсын хамтын ажиллагаа, цаашид хийх хөрөнгө оруулалтын талаар ярьсан. Хоёр улсын хооронд шууд нислэг хийх асуудлыг шийдвэрлэх асуудлыг ярьсан. CIB сангийн төлөөлөлтэй уулзаж, нэг тэрбум ам.долларын хөрөнгө оруулалтыг сангаар дамжуулж оруулахаар болсон. Далд уурхайн санхүүжилт шийдэгдсэнээр манай бондын хүү огцом өссөн. Манай бонд 2011 оны үеийн ханшдаа орсон. Хөрөнгө оруулалтын гэрээнд Засгийн газар гарын үсэг зурсан. 2009 оны Хөрөнгө оруулалтын гэрээнд өөрчлөлт хийгээгүй. Нууц гэрээний асуудал байхгүй.
Чуулганы хуралдаан үргэлжилж байна.
Н.Энх