Европын холбооны удирдлагууд өнгөрсөн сарын эхээр ОХУ-ын эсрэг хэрэгжүүлж буй эдийн засгийн хоригоо сунгаж буйгаа мэдэгдсэн билээ. Хориг ирэх оны нэгдүгээр сарын 31-нийг хүртэл хүчин төгөлдөр хэрэгжих юм. Энэхүү мэдэгдлийн хариуд ОХУ-ын Ерөнхий сайд Дмитрий Медведев мэдэгдэл хийсэн тухай “TASS” агентлаг мэдээллээ. Тэрбээр Европын холбооны орнуудад хүнсний импортын хоригийг зургаан сараар сунгаж буйгаа албан ёсоор мэдэгдсэн байна.
Хоригийн хугацааг сунгах тухай бичгээ Ерөнхийлөгчийн тамгийн газарт илгээсэн хэмээн Медведев хэвлэлийнхэнд мэдэгджээ. “Хүнсний бүтээгдэхүүний хоригт ямар нэгэн өөрчлөлт ороогүй” хэмээн Ерөнхий сайдын хэвлэлийн төлөөлөгч Наталья Тимакова ярьжээ. Гэхдээ Медведев ямар улсуудын хоригийн хугацааг сунгасан тухайгаа мэдэгдээгүй байна.
Өнгөрсөн оны наймдугаар сарын 7-нд ОХУ-ын Засгийн газар, Украины хямралаас үүдэж, улсынх нь эсрэг хориг тавьсан Европын холбоо болон АНУ, Их Британи, Канад, Герман, Норвеги, Франц, тэргүүтэй 18 оронд хүнсний хориг тавьсан юм. Хоригт багтсан орнууд бүх төрлийн архи, ундаа, чихэр, жимс, хүнсний бүтээгдэхүүн, галуу, шувууны мах, утсан мах, ургамлын тос, масло, давсалсан бүтээгдэхүүн, хүүхдийг нэмэлт тэжээл зэргийг Орост импортлох боломжгүй болжээ. Европын холбоо дээрх хоригоос болж хамгийн багадаа 10 тэрбум ам.долларын хохирол амсчээ.
Б.Дэлгэрцэцэг
Уншиж байна |