УИХ-ын гишүүн Н.Алтанхуягийг тагнуулын байгууллагаас дууджээ. Түүнийг хуулийн хугацаанд ирж, байцаалт өгөхийг хүссэн байна. Тэгвэл тэрбээр энэ дагуу Ерөнхий сайд Ч.Сайханбилэгт хандаж, тодруулга хүссэн байна.

Ерөнхий сайд асан Н.Алтанхуягийн санаачилсан хуулийн төсөлтэй холбогдон чамгүй асуудал үүсч байна. Тэрбээр АТГ-т зөвхөн авлига авсан, өгсөн,  зуучилсан гэх хэргийг үлдээж, бусдыг нь цагдаагийн байгууллагад шилжүүлэх хуулийн төсөл санаачилсан. Түүний хуулийн төслийг УИХ-ын чуулганы хуралдаанаар хэлэлцэх байсан ч ҮАБЗ-ийн хүсэлтээр унагаасан билээ. Тэгвэл энэ хуулийн төсөлтэй холбогдуулан Н.Алтанхуяг тагнуул болон авлигатай тэмцэх байгууллагын хараанд өртсөн бололтой. АТГ түүний ХОМ-ыг зөрчилтэй байж магадгүй хэмээн УИХ-ын ёсзүйн хороонд хандаад байгаа юм.