“Монголын хөрөнгийн бирж” ТӨХК болон Монголын геологи, уул уурхайн мэргэжлийн институт хоорондын харилцан ойлголцлын санамж бичигт гарын үсэг зурах арга хэмжээ Монголын хөрөнгийн биржид боллоо.  Санамж бичигт Хөрөнгийн биржийн гүйцэтгэх захирал Д.Ангар, Монголын геологи, уул уурхайн мэргэжлийн институтийн ерөнхийлөгч Д.Дамба нар гарын үсэг зурсан юм.  Тус байгууллагуудын хамтын ажиллагааны хүрээнд уул уурхай, геологийн салбарт ямар боломж нээгдэж буйг албаны хүмүүс ийн тодорхойлов.

Хөрөнгийн биржийн гүйцэтгэх захирал Д.Ангар:  Өнөөдрийн байдлаар Монголын уул уурхайн томоохон компаниуд Монголын Хөрөнгийн биржид бүртгүүлээгүй байна. Гэхдээ энэ дүр зураг дунд болон урт хугацаанд өөрчлөгдөнө гэсэн хүлээлттэй байна. Үндэсний томоохон уул уурхайн тэр дундаа стратегийн орд эзэмшигч компаниуд дотоодын хөрөнгийн биржид хувьцаагаа гаргаж, тэр нь олон нийтэд нээлттэй арилжаалагддаг боломж удахгүй нээгдэнэ гэдэгт итгэлтэй байна. Уул уурхайн компаниуд Хөрөнгийн биржид орж ирэхэд тухайн орд газрын нөөцийг зөв тодорхойлсон байх шаардлага тавигдана. Ингэхийн тулд уул уурхайн нөөцийг тодорхойлдог дотоодын стандарттай болох ёстой. Үүний эхлэл өнөөдөр нээгдэж байна.

Монголын геологи, уул уурхайн мэргэжлийн институтийн ерөнхийлөгч Д.Дамба:  Монголын геологи уул уурхайн мэргэжлийн институт байгуулагдаад жил гаруйн хугацаа өнгөрч байна.  Энэ хугацаанд Монгол Улс өөрийн гэсэн нөөцийн ангилалтай болсон.  Бид Хөрөнгийн биржтэй хамтран ажилласнаар Монголын уул уурхайн компаниуд өөрийн ордын нөөцийг ашиглаж, хувьцаа арилжаалах, хөрөнгө босгох боломж нээгдэж байна.

Уул уурхайн сайдын зөвлөх Бат-Эрдэнэ:  Өнөөдөр Монголын уул уурхай, геологи, эрдэс баялгийн салбарт нэгэн түүхэн үйл явдал болж байна. Энэ асуудлыг манай геологичид 2006 онд анх ярьж эхэлсэн. Өнөөдөр бид олон улсад гарах зорилтдоо нэг алхмаар ойртлоо.  Саяхан бид Эрдэс баялагийн салбарт төрөөс баримтлах бодлого болох Ашигт малтмалын хуульд энэ асуудлыг оруулсан.  Уул уурхайн яам шат дараалалтайгаар Монголын инженер, геологичдыг олон улсын түвшинд гаргахад асуудлыг хууль эрхзүйгээр баталгаажуулж байна.

В.Бат