УИХ-ын дарга хэлсэн үгэндээ хүрч, наймдугаар сарын 3 буюу ирэх даваа гаригт ээлжит бус чуулган зарлан хуралдуулах захирамж гаргалаа. Ээлжит бус чуулганаар зарим хуулийн төслийг хэлэлцэхээр төлөвлөсөн хэдий ч гол асуудал нь Ч.Сайханбилэгийн Засгийн газар дахь МАН-ын 6 сайдыг огцруулна. МАН-ын 6 сайдын орны хүмүүсийг томилох улс төрийн тохироо хэдийнэ хийгджээ. АН-ын Гүйцэтгэх зөвлөл МАН-тай хийсэн гэрээгээ цуцалж, бусад улс төрийн хүчнүүдтэй суларсан сайдын суудалд “бялуу хуваачихаад” байна.
МАХН-МҮАН-ын “Шударга ёс” эвсэлд хоёр сайдын суудал оногджээ. Одоогоор засагт хамтарсан ИЗНН-д сайдын суудал санал болгосон эсэх нь тодорхойгүй байна. Хэрвээ зөвхөн МАН-ын зургаан сайдыг сольж, Засгийн газрын үйл ажиллагааг үргэлжлүүлнэ гэвэл Шадар сайдаар Монгол банкны дэд Ерөнхийлөгч Э.Батшугар, Сангийн сайдад Р.Амаржаргал, БОАЖНХ-ийн сайдаар Г.Баярсайхан, БХБ-ын сайдад Ц.Баярсайхан, Зам тээврийн сайдад УИХ-ын даргын зөвлөх А.Гансүх, Хөдөлмөрийн сайдад Л.Эрдэнэчимэг нарыг томилох сураг явж байна.
Монгол Улсын сайд М.Энхсайхан “МАН-ыг Засгаас гаргавал би ажлаа хүлээлгэж өгнө” гэж хэвлэлээр мэдэгдсэн байсан. Тиймээс УИХ дахь “Шударга ёс” эвсэл дэх МАХН, МҮАН-ынхан хоорондоо хагаралдаж, эвсэл задарч мэдэхээр байна. Учир нь АН одоогийн байдлаар тус эвсэл дэх МАХН-тай улс төрийн тохироо хийчихээд байгаа. Харин М.Энхсайхан сайдыг огцруулбал түүний оронд МАХН-аас сайдад нэр дэвшүүлэх хувилбар явж байгаа юм билээ. Гэхдээ Шадар сайдын суудалд МАХН-аас томилогдвол Монгол Улсын сайдын албыг дахин тус намд өгнө гэдэг юу л бол. Харин Засгийн газарт хамтарсан ИЗНН-д Монгол Улсын сайдын суудал оногдох магадлалтай. Монгол Улсын сайдын алба нь яамгүй, томоохон мега төслүүдийг хэрэгжүүлэх ажлыг хариуцдаг. Тиймээс энэ суудалд ИЗНН-ын дарга С.Оюун томилогдох магадлалтай гэж ажиглагчид үзэж байгаа юм. УИХ-ын гишүүн, ИЗНН-ын дарга С.Оюун өнөөдрийн байдлаар эзгүй, гадаадад ажлаар яваа юм.
Нөгөөтэйгүүр ээлжит бус чуулганаар зөвхөн МАН-ын 6 сайдыг огцруулж, шүд сугалах үйл ажиллагаа явуулж байхаар Ч.Сайханбилэгийн Засгийн газрыг огцруулах асуудлыг хэлэлцэх нь зүйтэй гэж О.Баасанхүү нарын гишүүн цахим сүлжээгээр дамжуулан жиргэж байна лээ.
О.Баасанхүү гишүүн л хэлсэн болохоос энэ удаад 6 сайдаа танхимаасаа огцруулсан шийдлийн Засгийн газрын хувь заяа ирэх намар огцрох нь тодорхой болоод байгаа. Засгийн газраас хөөгдсөн МАН дуугүй суугаад байхгүй, дугтарч л таарна.
Ч.Сайханбилэгийн Засгийн газрыг огцруулаад дараагийн Засгийг байгуулахад АН парламент дахь бусад улс төрийн хүчнүүдтэй хамтрахаас өөр зам байхгүй. Учир нь тэд парламентад олонхи бус олон суудалтай нам. Хэдийгээр УИХ-ын дарга З.Энхболд “Ч.Сайханбилэгийн Засгийн газрыг огцруулахгүй” гэж мэдэгдсэн ч АН-ын Гүйцэтгэх зөвлөлийн шийдвэр, намын дарга нь Ерөнхий сайд байх хуулийн дагуу томилогдож байна гээд Засгийн газрыг тэргүүлэхийг үгүйсэх аргагүй.
Нөгөөтэйгүүр Засгийн газрын сайд нараа огцруулах асуудлыг Ерөнхий сайд өргөн барихгүй гэдэг байр суурин дээр хэвээр гэдгээ өнөөдөр ч бататгасаар байгаа. Тиймээс АН-ын Гүйцэтгэх зөвлөлийн шийдвэрийн дагуу МАН-тай байгуулсан гэрээгээ цуцалж, сайд гишүүдийг нь огцруулах асуудлыг УИХ дахь АН-ын бүлгийн дарга Д.Гарамгайбаатар оруулж ирэх бололтой. Харин МАН-ын зүгээс “Хадаг барин урьж залснаараа манай 6 гишүүний асуудлыг Ерөнхий сайд өөрөө шийдээрэй” хэмээн хатгасан.
Нэгэнтээ хуулийн дагуу Ерөнхий сайдын захирамж гарсан болохоор ээлжит бус чуулган хуралддагаараа хуралдаж, Засгийн газрын сайд нарыг огцруулах асуудлыг хэлэлцэх асуудлын жагсаалтын эхэнд тавьжээ. Ийнхүү Ч.Сайханбилэгийн танхимыг парламент дахь бусад хүчин бус эрх баригчид өөрсдөө хөшиж, сайд нарыг нь сугалж эхэллээ. Тун удахгүй АН-ынхан Ерөнхий сайдын тамгыг нь ч Ч.Сайханбилэгээс булаан авах биз.
Наймдугаар сарын нар төөнөсөн халуун өдрүүдээр улс төр ч дотроосоо ширүүхэн буцлах нь ээ.
Н.Энхбат