Хятадын боомт хот Тяньжинд өчигдөр 23.30 цагт хүчтэй дэлбэрэлт болж, 42  хүн амиа алдаж, гэмтэж бэртсэн хүмүүсийн тоо 500-д хүрсэн тухай “Ройтерс” агентлаг мэдээллээ. Хохирлын хэмжээг тогтоохоор албаныхан ажиллаж байгаа бөгөөд гал түймрийг унтраахаар 250 гаруй гал сөнөөгч ажиллаж байна.

Дэлбэрэлтийн улмаас тус хотод байрлах хамгийн том автомашин худалдаалдаг зах их хэмжээний хохирол амсчээ. Энэхүү захад ойролцоогоор шинэ болон хуучин 4000 гаруй автомашин зарагдаж байсан гэнэ. “Бүх машин дахин ашиглах боломжгүй, хэрэггүй хог болсон” хэмээн тус захын захирал “Синьхуа” агентлагт ярьжээ.

Авто захаас гадна худалдаа үйлчилгээ болон авто зогсоолд байсан 700 гаруй автомашин дэлбэрчээ. “Тяньжинд хаа сайгүй гал түймэр гарч, орилж хашгирсан хүмүүс байна. Нэг үгээр илэрхийлвэл “дайны үеийг санагдуулам” хэмээн “AFP” агентлаг мэдээлсэн байна. Мөн дэлбэрэлт болсон газраас холгүй байрлах орон сууцнуудыг цонх хагарч, иргэд багагүй хохирол амсчээ.

Б.Дэлгэрцэцэг