Жүдо бөхийн дэлхийн аварга шалгаруулах тэмцээн энэ сарын 24-30-ны өдрүүдэд Казахстаны нийслэл Астана хотноо болно.
Дэлхийн 137 орны 823 шилдэг тамирчин оролцохоор мэдүүлгээ өгөөд буй энэхүү тэмцээнд Монгол Улсын шилдэг тамирчид дэлхийн аваргын төлөө хүч үзнэ.
Эрэгтэйчүүдийн -60 кг-ын жинд гавьяат тамирчин Г.Болдбаатар жингээ тэргүүлэн барилдана. Мөн түүний жинд Ц.Цогтбаатар хүч үзнэ. -66 кг-д олон улсын хэмжээний мастер Д.Төмөрхүлэг, Хөдөлмөрийн баатар, гавьяат тамирчин Х.Цагаанбаатар нар барилдах бол -73 кг-ын жингийн барилдаанд гавьяат тамирчин С.Ням-Очир, Г.Одбаяр нар зодоглоно. Тэгвэл -81 кг-д Н.Дагвасүрэн, -90 кг-д Л.Отгонбаатар, -100 кг-д Хөдөлмөрийн баатар, гавьяат тамирчин олимпийн аварга Н.Түвшинбаяр барилдана. Манайхаас +100 кг-ын жинд бөх оролцохгүй.
Харин эмэгтэйчүүдийн -48 кг-д гавьяат тамирчин М.Уранцэцэг, Б.Хорлоодой нар барилдах бол -52 кг-ын жинд М.Бундмаа, А.Цолмон, -57 кг-д Д.Сумъяа, -63 кг-ын жинд Ц.Мөнхзаяа, Ц.Цэрэннадмид нар хүч үзнэ. -78 кг-д П.Лхамдэгд, +78 кг-ын жинд О.Жавзмаа барилдана. Эмэгтэйчүүдийн -70 кг-д манай улсаас бөх байхгүй. ДАШТ-д оролцохоор 328 эмэгтэй тамирчин мэдүүлгээ өгөөд байгаа аж.
Тамирчдадаа амжилт хүсье.
Б.Бэхи
Уншиж байна |