Засгийн газрын сайд нарыг томилох улс төрийн тохироо эцэслэгдээгүй байна. Огцруулсан сайд нарын орны хүнийг томилох асуудал  улс төрийн хүрээнд ч, намууд дотроо ч  асуудал дэгдээж байгаа юм.

Засгийн газрын 6 сайдын томилгооны асуудлыг зөвшилцлөхөөр АН, “Шударга ёс” бүлгийн ажлын хэсэг санал солилцож байгаа. АН-ын зүгээс МАХН-МҮАН-ын хамтарсан “Шударга ёс” эвслийн бүлэгт 2 сайдын квотыг өгөх санал тавьсан. Харин  АН-ын зүгээс  Сангийн сайдад Н.Батбаяр, БХБ-ын сайдад Я.Санжмятав, БОНХАЖ-ын сайдад Г.Баярсайхан, Зам тээврийн сайдад Л.Эрдэнэчимэг нарын нэрийг өргөн барихаар ярилцжээ.

Гэхдээ Шинэчлэлийн Засгийн газрын үеэд Эдийн засгийн хөгжлийн сайдаар ажиллаж, улсын эдийн засгийг хямруулсан гэх  “муу нэр луу данстай” Н.Батбаярыг  Сангийн сайдад томилвол намын нэр хүндэд ч сөргөөр нөлөөлнө гэж  намын гишүүдийн зүгээс эсэргүүцэлтэй тулж байгаа аж. Мөн Г.Баярсайхан, Л.Эрдэнэчимэг нарыг салбарын сайдын ажлыг аваад удирдаад явчих   “мэдлэг дутна” гэх шүүмжлэл  нам дотроо байтугай нийгэмд яригдаж, хүлээн зөвшөөрөгдөхгүй байгаа юм.  Харин сайдад нэр дэвшигчид “Би чадна” хэмээн намтрын хуудсаа нэмэхээр намынхаа гишүүдэд лобби хийн улайрч яваа дуулдана

 Харин “Шударга ёс” эвслийн зүгээс квотоо чамлаж, сайд нарын томилогоог зөвшилцөх ажлын хэсгийн ахлагч, МАХН-ын дарга Н.Энхбаярын зүгээс шантааж хийж байгаа сурагтай.

Ийнхүү Ерөнхий сайд Ч.Сайханбилэг сайдад горилогчид болон шантаажлагчдын үг, үйлдэлд шүршүүлэн, Засгийн газрын зарим гишүүдийн нэрийг өргөн барьж чадахгүй “морь унасан толгой”-гүй хүн адил гацаанд ороод байна.  

Э.Сонор