“Эрдэнэс Тавантолгой” компанийн ТУЗ-ийн дарга, ЗГХЭГ-ын дэд даргаар ажиллаж байсан Г.Дэнзэнг албан тушаалаа урвуулан ашигласан хэрэгт сэжиглэн АТГ-аас цагдан хориод байгаа билээ. Одоогоор түүнд холбогдох хэргийн шүүх хурал болоогүй, Г.Дэнзэн сэжигтэн төдий байгаа ч түүнийг мөрдөн байцаалтын ажиллагаанд саад учруулна гэсэн үндэслэлээр саатуулаад байгаа юм.

Г.Дэнзэн хууль шүүхийн энэ мэт бусармаг үйлдлийг эсэргүүцэн хоёр долоо хоногийн өмнөөс өлсгөлөн зарлаж эхэлсэн. Өлсгөлөн зарлаж болохгүй, сахарын өвчинтэй учраас хүндэрнэ гэсэн эмчийн дүгнэлтийг үл тоон өлсгөлөн зарласан тэрбээр хоёр ч удаа ухаан алдаж, бүр комын байдалд орсон гэх мэдээлэл гараад байгаа билээ.

Тэгвэл Г.Дэнзэн гэрээслэлээ бичсэн байна. Үүнийгээ түүнтэй уулзахаар очсон УИХ-ын гишүүн Ц.Оюунгэрэлд өгчээ. Энэ талаар болон түүний биеийн байдал ямар байгаа талаар бид УИХ-ын гишүүн Ц.Оюунгэрэлтэй утсаар холбогдон цөөн асуултад хариулт авлаа.

-Сайн байна уу, гишүүн ээ. Шүүхийн шийдвэрийг эсэргүүцэн өлсгөлөн зарлаад байгаа Г.Дэнзэнтэй уулзсан гэж сонслоо. Гэрээслэл бичсэн гэдэг үнэн үү?

-Тэгсэн. Би сая өмгөөлөгчид нь хүргэж өгөөд явж байна.

-Биеийн байдал нь ямар байна вэ. Та уулзав уу?

-Үнэхээр хүнд байна. Хоёр хөлөө дааж чадахгүй, дуу нь цаашаа орчихсон. Толгойгоо ч даах тэнхэлгүй байна. Хүний хэлж ярьж байгаа зүйлд хариу үйлдэл үзүүлэхдээ их удаан болчихжээ. Ер нь биеийн байдал нь үнэхээр хүнд байгаа.

-Одоо хүртэл өлсгөлөн зарлаж байгаа юу?

-Тийм байна. Өлсгөлөнгөө зогсоогоогүй.

-Нүд нь юм харахаа больсон, комд орсон гэх мэдээлэл гараад байгаа?

-Хоёр нүд маш муу харж байгаа гэсэн. Хэд хэдэн удаа ухаан балартаж унасан шинж тэмдэг илэрсэн гэж эмч нар нь хэлж байна.

Эх сурвалж: www.mminfo.mn