Засгийн газар 6 сайдын нэрээ өргөн барихыг хүлээж байна хэмээн УИХ-ын дарга З.Энхболд жиргэсэн байсан. Гэвч одоогийн байдлаар Ерөнхий сайд Ч.Сайханбилэг сайдаар томилох 6 эрхмийн нэрийг УИХ-д өргөн бариагүй байна.
АН-ынхан сайдаар томилох гишүүдийн нэрс дээр тохироонд хүрээгүй гэх яриа Төрийн ордонд тархлаа. АН-ын бүлгээс УИХ-ын гишүүн Н.Батбаяр, Г.Баярсайхан, Л.Эрдэнэчимэг нарыг сайдаар томилуулахаар болсон ч Ерөнхий сайд хамтарч ажиллаж чадахгүйгээ мэдэгдсэн. Тиймээс Ерөнхий сайдыг Засгийн газрын гишүүдээ өөрөө оруулж ирэхийг даалгасан гэх мессэж тархсан. Гэхдээ АН-ынхан Ерөнхий сайдын санал болгосон сайд нарыг мөн л хүлээж аваагүй бололтой.
Харин Засгийн газарт хамтрах асуудлыг зөвшилцөх УИХ дахь “Шударга ёс” эвслийн ажлын хэсгийн ахлагч, МАХН-ын дарга Н.Энхбаяр өнөөдөр АН-ын дарга З.Энхболдтой дахин уулзалт хийсэн юм. Уулзалтын дараагаар тэрбээр “Манай эвслийн бүлэг сайдын асуудлыг тохиролцоогүй байна” гэсэн юм. Гэхдээ эх сурвалжийн мэдээлснээр “Шударга ёс” эвслийн бүлгийнхэн УИХ-ын гишүүн Н.Батцэрэг, З.Баянсэлэнгэ, Ц.Оюунбаатар нарыг сайдад томилохоор тохиролцсон сурагтай.
Ямартай ч өнөөдөртөө багтааж Ерөнхий сайд 6 сайдынхаа нэрийг УИХ-д өргөн барих бололтой.
Н.Нягт
Уншиж байна |