Холливуудын нэрт жүжигчин Люси Лью тээгч эхийн тусламжтай өчигдөр 11.00 цагт 3.8 кг хүүтэй болсон тухай “www.hollywoodlife.com” мэдээллээ. Тэрбээр хүүтэйгээ авахуулсан зургаа твиттертээ байршуулаад “Хөөрхөн үртэйгээ. Гайхалтай байна. Үнэхээр гайхалтай байна. Би жаргалтай байна” гэж жиргэжээ.

46 настай жүжигчин хүүгээ Рокуэлл Лиу хэмээн нэрлэсэн байна. Жүжигчний хэвлэлийн төлөөлөгч “Us Weekly” сэтгүүлд “Ээж, хүү хоёрын биеийн байдал хэвийн байгаа. Тэд жаргалтай байгаа” гэж ярьжээ.

Люси Лью өнөөдрийг хүртэл хуримаа хийж байгаагүй. Тэрбээр 2008 оноос бизнесмэн Ноам Готтесмэнтэй үерхэх болсон. Тэднийг өнгөрсөн оны аравдугаар сард сүй тавьсан хэмээн мэдээлсэн ч жүжигчний агентлаг батлаагүй юм.

Б.Дэлгэрцэцэг