Киев хотноо болж буй эсэргүүцлийн жагсаалтай холбоотойгоор тус улсын Ерөнхийлөгч Петр Порошенко “Ukraine 1” телевизээр дамжуулан жагсагчдыг тайван байхыг уриалсан тухай “TASS” агентлаг мэдээллээ. Тэрбээр “Киев хотноо үргэлжиж буй эсэргүүцлийн жагсаалын үеэр цагдаагийн байгууллагын нэг ажилтан амиа алдсанд харамсч байна. Парламентын ордон руу тэсрэх бөмбөг шидсэн этгээд хуулийн дагуу шийтгэл авах болно.  “Нормандын дөрвөл”-ийн байгуулсан “Минск”-ийн гэрээний хэрэгжилт хангалтгүй байгаа учир салан тусгаарлагчдын хяналтад байгаа бүс нутагт илүү эрх мэдэл олгох шинэчлэлтийг Украины Үндсэн хуульд оруулахаар төлөвлөж байна. Бид шинэчилсэн хуулийн хүрээнд зүүн хязгаарыг эргүүлэн авах боломжтой. Харин энэхүү хууль украинчуудад таалагдахгүй байгаа бололтой. Украинд дахин хямрал хэрэггүй. Бид ярилцаж, шийдэлд хүрэх ёстой” гэж мэдэгджээ.

“Свобода” намын дэижигчид Киев хотноо жагсч байгаа бөгөөд Дээд Рада буюу парламент тус хуулийг баталсан тохиолдолд  Майданы хувьсгалыг эхлүүлж, Порошенког суудлаас нь түлхэн унагаах болно гэдгээ сануулжээ.

Өнгөрсөн сарын 31-ны 18.00 цагаас эхэлсэн эсэргүүцлийн жагсаал өнөөдрийг хүртэл үргэлжиж байна. Жагсаалд ойролцоогоор 3500 хүн оролцож байгаа бөгөөд 470 орчим цагдаа ажиллаж байгаа юм. Цагдаа нар ордон руу тэсрэх бөмбөг шидсэн этгээдийг баривчилсан бөгөөд эмх замбараагүй байдал үүсгэж, зөвшөөрөлгүй галт зэвсэгтэй байсан 30 хүнийг тусгаарлаад байна. Дэлбэрэлтийн үеэр 131 хүн гэмтэж, 59 хүн эмнэлэгт хүргэгджээ. Өчигдөр 147 хүнийг саатуулсан аж.

Б.Дэлгэрцэцэг