Алан хүүг сүүлчийн замд нь үдэв
2015-09-06 10:30

 

Сирийн Кобане хотоос Грекийг чиглэн явж байсан завь энэ сарын эхээр осолдож, 14 хүн амиа алдсан билээ. Ослын газар аврагчид ирэх үед тус завинд зорчиж явсан хоёр настай Алан Курди гэх хүү сураггүй алга болсон юм. Хүүг 24 цагийн турш ослын газрын ойр орчмоос хайсан ч олдоогүй аж. Харин хүүгийн цогцос хоёр хоногийн дараа Туркийн Бодрум хотын ойролцоо далайн эргийн ойролцоо доош харан хэвтэж буй байрлалтай олдсон юм. Хүүгийн зургийг Доган” мэдээллийн агентлагийн зурагчин авч, өөрийн твиттертээ байршуулж, дүрвэгсдийн асуудалд анхаарлаа хандуулахыг уриалсан билээ. Алан хүүгийн зургаас болж Европын 20 гаруй оронд эсэргүүцлийн жагсаал болж Грек, Их Британи, Канад, Германы удирдлагуудыг буруутгаж “Тэд хүүг алчихлаа” гэх эсэргүүцлийн хөдөлгөөн зохион байгуулж байна.

 

Алан хүү ганцаараа амиа алдаагүй бөгөөд ээж Рихан болон таван настай ах Галипийн хамтаар хорвоогоос явжээ. Хүүгийн аав Абдулла Курди ослоос амьд үлдсэн бөгөөд энэхүү үйл явдлын дараа Канадын Засгийн газар орогнол олгохоор болсон гэнэ.  Алан хүүгийн гэрэл зураг сошиал ертөнцөд түймэр мэт хүчээ авсаны дараа Европын холбооны удирдлагууд 800 мянган дүрвэгсдийг хүлээн авахаар болжээ.

 

Үхлээрээ олон зуун цагаачдыг аварсан баатарлаг хүү Аланыг өчигдөр сүүлчийн замд нь үдсэн тухай “Ройтерс” агентлаг мэдээллээ. Оршуулах ёслолд хүүгийн аав болон 1000 гаруй хүн оролцсон байна.

 

Б.Дэлгэрцэцэг

Shuud.mn
Сонин хачин