Хил хамгаалах байгууллагын “Нээлттэй хаалга”-ны өдрийн хүрээнд анх удаа “Хилчдийн бүтээл” үзэсгэлэн худалдаа өнөөдөр Тусгаар тогтнолын талбайд зохиогдлоо. Хилийн цэргийн алба хаагчдын бүтээлийг ард иргэдэд танилцуулах зорилготой энэхүү үзэсгэлэн худалдаанд Хилийн цэргийн 30 гаруй анги, хороо оролцов. Оролцогч анги салбарууд ой тайгын, уулын, говь цөлийн, төвийн, тал хээрийн хилийн бүс гэсэн 5 хэсэгт хуваагдан анги салбараа сурталчлахаас гадна өөрсдийн бэлтгэж боловсруулсан хүнс болон бараа бүтээгдэхүүний үзэсгэлэн худалдааг явуулж байлаа.
Хилд ургадаг эмийн ургамлууд болон хилчдийн өсгөж үржүүлдэг, ходоодны шархыг эдгээдэг гэх бөднө шувууны өндөг, хорт хавдрыг эмчилдэг хэмээх “гишүүнэ”, үрэлний навч, сөд өвс, цээний үр, даршилсан хөмүүл, улаан лооль, мангидын хурууд, морин хуур, ногт чөдөр гээд хүнсний болон ахуйн хэрэглээний олон нэр төрлийн бараа бүтээгдэхүүн уг үзэсгэлэнд тавигджээ.
“Эдгээр бүтээгдэхүүнийг хилийн цэргийн анги отрядын ажилчин, албан хаагчид өөрсдөө бэлдэж, боловсруулсан гэхээр тэнд өөрийгөө хангах зарчим хэрэгжиж байна. Төмсний аж ахуйг ч хөгжүүлж болохоор харагдаж байна” хэмээн Хүнсчдийн холбооны ерөнхийлөгч, ШУТИС-ийн багш профессор Л.Дамдинсүрэн үзэсгэлэнгийн нээлтэнд оролцох үеэрээ хэлж байв.]
Үзэсгэлэн худалдаа маргааш 19:00 цаг хүртэл Тусгаар тогтнолын талбайд үргэлжлэх юм байна.
Г.Тэгшсүрэн
| Уншиж байна |