Хойд Солонгосын нийслэл Пхеньян хотноо өчигдөр орон нутгийн цагаар 10.00 цагт “Хөдөлмөрийн нам” үүсэн байгуулагдсны  70 жилийн ойн баярыг тэмдэглэж, цэргийн сүрт жагсаал боллоо.

Төрийн мэдлийн “KCNA” агентлаг “Батлан хамгаалах яамны 20 мянган цэрэг, дайчин парадад оролцож, Хойд Солонгосын сүр хүчийг дэлхийд гайхууллаа” гэж мэдээлжээ.

Удирдагч Ким Чен Ун ард түмэндээ хандан “Бидний зоригийг хэн ч мохоож чадахгүй” гэж хэлсэн байна. Энэ өдөр Пхеньянчууд амарч, парадыг шууд хүлээн авч үзжээ.

Парадын турш удирдагчийн дэргэд БНХАУ-ын “Коммунист нам”-ын Улс төрийн товчооны байнгын хорооны гишүүн Лю Юньшань зэрэгцэн суусан байна. Тэрбээр парадын дараа тус улсын “Хөдөлмөрийн нам”-ын удирдлагуудтай уулзаж, цаг үеийн асуудлаар ярилцсан хэмээн “Синьхуа” агентлаг мэдээлэв.

“Лю Юньшань Пхеньянд хүрэлцэн ирсэн нь нэр төрийн хэрэг. Таны айлчлал хоёр улсын найрамдлын гүүр болно гэдэгт итгэлтэй байна” хэмээн удирдагч хэлжээ.

Б.Дэлгэрцэцэг