Ардчилсан намын Ерөнхий нарийн бичгийн даргын үүрэг гүйцэтгэгч Л.Эрхэмбаяр, Намын байгуулалтын газрын дарга Л.Уртнасан, Ерөнхий нарийн бичгийн даргын зөвлөх Б.Цолмонбаяр нар мэдээлэл хийлээ. Хурлын үеэр АН мөрийн хөтөлбөрөө тайлагнах болсноо дуулгав. Тус нам мөрийн хөтөлбөрийн биелэлтээ танилцуулах ажлыг энэ сарын 10-наас эхэлж, 12 дугаар сарын 10 хүртэл орон даяар зохион байгуулах юм байна.
Ардчилсан намын генсек Л.Эрхэмбаяр, “Ардчилсан нам 2015 оны найм, есдүгээр сард “Монгол хүн 2020 өнөөдөр, маргааш...” бүсийн чуулганыг баруун, зүүн, хангай, төвийн бүсэд намынхаа гишүүд дэмжигчдийн хүрээнд амжилттай зохион байгууллаа. Энэ чуулганыг хийх явцад гишүүдийн зүгээс “Ардчилсан нам хийсэн ажилтай, хэлэх үгтэй байна. Үүнийгээ ард түмэндээ тайлагнах хэрэгтэй” гэсэн үүрэг даалгаврыг өгсөн. Тиймээс Ардчилсан нам орон даяар мөрийн хөтөлбөрийг тайлагнах өдрүүдийг эхлүүлж байна” гэв.
Ардчилсан нам 2012 оны УИХ-ын сонгуульд “Монгол хүн 2020” гэсэн мөрийн хөтөлбөртэй орсон. “Ажилтай орлоготой-Монгол хүн”, “Аюулгүй орчинтой-Монгол хүн”, “Эрүүл чийрэг-Монгол хүн”, “Эрдэм боловсролтой-Монгол хүн”, “Эрх чөлөөтэй-Монгол хүн” гэсэн таван дэд хэсгээс бүрдсэн мөрийн хөтөлбөрийн биелэлтээ танилцуулна. Мөн 2020 он хүртэл үргэлжлэх “Монгол хүн 2020” мөрийн хөтөлбөртөө ард иргэдийн санал бодлыг тусгах нь энэ ажлыг эхлүүлж буй аж.
Уншиж байна |