УИХ-ын чуулганы нэгдсэн хуралдаанаар Өршөөл үзүүлэх тухай хуулийн төслийг хэлэлцэх байсан ч “Шударга ёс” эвсэл завсарлага авлаа. Хуульзүйн байнгын хорооны дарга Д.Ганбат байнгын хорооны дүгнэлтийг танилцуулсны дараагаар гишүүн Ц.Цолмон  Өршөөл үзүүлэх тухай хуулийн төслийг хаалттай хэлэлцүүлэх санал гаргасан юм. 

Горимын саналтай холбогдуулан гишүүд үг хэллээ.  

УИХ-ын гишүүн Х.Тэмүүжин:

-Нэг нээгээд нэг хаагаад байх нь олон нийтийн төрд итгэх, хууль тогтоогчдыг хардах сэтгэлийг нэмэгдүүлнэ. Хуулийг хаалттай хэлэлцсэн. Хоригийг нээлттэй хэлэлцсэн. Тиймээс энэ горимын саналаа татаад авчихвал ямар вэ гэсэн бол МАН-ын бүлгийн дарга С.Бямбацогт:

-Хориг хүлээж авахдаа нээлттэй хэлэлцсэн. Хориг хүлээж авсны дараагаар Өршөөлийн хуульд нэмэлт өөрчлөлт оруулах төслийг нээлттэй хэлэлцсэн. Ард иргэдээс нуугаад байх зүйл байхгүй. Олон түмэн хэн ямар байр суурьтай байгааг мэдэх нь зүйтэй юм.

УИХ-ын гишүүн Д.Тэрбишдагва “Манай бүлгийн дарга гадаадад томилолттой байгаа. Тиймээс бид энэ асуудалд завсарлага авч байна” гэлээ.

Ийнхүү “Шударга ёс” эвсэл Өршөөл үзүүлэх тухай хуулиар 5 хоногийн завсарлага авлаа.