Украины зүүн хязгаарт осолдсон Малайзын “МН17” онгоцыг “Бук” пуужин сөнөөсөн хэмээн Голландын шинжээчид мэдэгдсэн билээ. Онгоцыг пуужин сөнөөсөн нь тогтоогдсон ч хэргийн жинхэнэ эзнийг илрүүлж чадаагүй юм. Голландын шинжээчид болон барууны орнууд онгоцыг Оросын Засгийн газрын захиалгаар Украины зүүн хязгаарт хяналтаа тогтоохыг санаархаж буй салан тусгаарлагчид пуужингаар харвасан хэмээн сэрдэж буйгаа мэдэгдсэн билээ. Тэгвэл дээрх осолтой салан тусгаарлагчид ямар ч холбоогүй гэдгээ мэдэгдсэн тухай “TASS” агентлаг уламжлав.
Донецк мужид хяналтаа тогтоож, өөрийгөө Ерөнхийлөгч хэмээн өргөмжилсөн Александр Захарченко “МН17 онгоц осолдох үед “Бук” бидэнд байгаагүй. Тиймээс бид энэ осолтой ямар ч холбоогүй. Тусгай мөрдлөгө явуулж болно. Онгоцыг Украины армийнхан сүйрүүлсэн” гэж мэдэгджээ.
Шинжээчдийн гаргасан тайланг хэтэрхий нэг талыг барьсан хэмээн ОХУ-ын Гадаад хэргийн сайд Сергей Лавров шүүмжилсэн байна. Тэрбээр “Орост Бук пуужинг ашиглахаа больсон. Мөн шинжээчид осолтой биднийг холбохыг хичээж байгаа нь таалагдахгүй байна” гэсэн бол Украины Ерөнхийлөгч Петр Порошенко “Осолд Орос болон салан тусгаарлагчид буруутай. Тэд санаатай аллага үйлдсэн. Буруугаа хүлээх ёстой” гэжээ.
Б.Дэлгэрцэцэг
Уншиж байна |