УИХ-ын чуулганы нэгдсэн хуралдаан Хилийн тухай хуулийн төслийг хэлэлцэх эсэхийг шийдэж байна. Хилийн тухай хуульд өөрчлөлт оруулах асуудлаар гишүүн Х.Тэмүүжин эсрэг байр суурьтай байсан юм. Хилийн цэргийг Гадаадын иргэн харьяатын албанаас татаж байгааг тэрбээр эсэргүүцэж байлаа. Учир нь иргэд дунд нь чирэгдэж байна гэж тэрбээр үзсэн юм. Тиймээс ч тэрбээр тун бухимдалтай “Хилийн боомтын талаар Ч.Сайханбилэг ЗГХЭГ-ын дарга байх үедээ өөрчлөлт оруулснаа Ерөнхий сайд болоод буцаад дахин өөрчилсөн. Иргэдийг дунд нь хохироож, чирэгдүүлж байна. Эдийн засаг эдийн засаг гэж гарч ирчээд н эдийн засгийн талаар дорвитой ажил хийгээгүй. Эдийн засаг улам сульдаж байна. Өчигдөр нэг багтай, өнөөдөр өөр багтай болж байна. Сайханбилэг хоёр нүүртэй, туйлбаргүй бодлоготой. Ийм Засгийн газрыг хамгаалаад зогсож байх юм уу. Би мэдэхгүй байна. Д.Дорлигжавтай бүүр ярих юм байхгүй. Өмнө нь хийсэн зүйлийг бүгдийг устгаж байна. Арчаагүй арьс” хэмээн цухалдсан.
Харин үүний хариуд Д.Дорлигжав сайд “Хилийн зөрчил, хил дээр гарсан ноцтой үйлдлийн талаар яригддаг. Хилийн цэргээс иргэний харьяат руу очсон хүн буцаж хил рүүгээ очно. Намын асуудлыг нам дээрээ ярья гэлээ.
Хуульзүйн байнгын хорооны дарга Д.Ганбат чуулганы хуралдаанаас чөлөө авсан байлаа. Тиймээс тус байнгын хороог төлөөлж УИХ-ын гишүүн Ц.Нямдорж:
-Засгийн газраас мөрдөж байгаа хууль нь одоо мөрдөж байгаа хуулинд 7 өөрчлөлт оруулж байгаа. Нэр сольж байгаатай холбоотой Х.Тэмүүжин гишүүн бухимдаад байгаа. Хуулийн төсөл өргөн мэдүүлсэн хүмүүс байнгын хороон дээр тайлбар хэлсэн. Үүн дээр сүртэй том өөрчлөлт ороод байгаа зүйлгүй. Хилийн зөрчлийн асуудал маргаантай байгаа. Миний үед Гадаадын иргэн харьяатынхан өөрсдийн харьяалалд авах гэсэн санал өгсөн. Би өгөөгүй. 200-гаад хүн шалган нэвтрүүлэхээс Гадаадын иргэн харьяатын албанд шилжсэн. Одоо буцаж хилийн цэрэгтээ очно. Монголын хуулийн тогтолцоо Монголдоо л таарсан байх ёстой. Х.Тэмүүжин гишүүн бид хоёрт санал нийлдэг зүйл байдаг. Бас нийлдэггүй зүйл байдаг. Гадаадын хуулийг тогтолцоон дээр яриад байгаатай санал нийлэхгүй байгаа юм. Хил яг л тийм. Хилийн шалган нэвтрүүлэхийг Гадаадын иргэн харьяатын албан өгсөн нь буруу. Х.Тэмүүжин чи одоо наадахаа боль, бүүр өвчин боллоо. Социализмын үед бүх зүйл муу байсан гэж хэн хэлсэн юм. Тэр үед үүнээс илүү амьдралтай, үүнээс илүү төр улсынхөө төлөө зүтгэж байсан хүн байсан юм. Чи бид тэр үеийн угшилтай гэлээ.
Н.Нягт