“Монгол байгаль дэлхийд ганц” ТББ-аас “Гацууртын орд ба шантаачлагчид” сэдвээр хэвлэлийн хурал хийлээ. Уг хурлын үеэр “Босоо хөх Монгол” бүлгэмийн гишүүд ирж нэлээдгүй маргаан үүсгэсэн юм.

Ноён уул орчмын нөхцөл байдалтай энэ сарын 10-нд “Монгол байгаль дэлхийд ганц” ТББ-ийн гишүүд танилцсан аж. Бодит байдалтай танилцах үеэр гар аргаар алт олборлодог 500 орчим хүн, 80 гаруй цооног үүсгэж ухалт хийж байсан аж. Тэднийг Ноён уулын бүсээс гаргахаар шаардлага тавьж буй “Бүрэн цэнгэл” хамгаалалтын байгууллагын хүч хүрэхгүй байгаа байдал харагджээ. Иймд гар аргаар алт олборлогчдыг төрийн хяналтын дор хөөж гаргахгүй бол эрүүгийн гэмт хэрэг үүсэх нөхцөл байдал үүссэн байгааг тэд хэллээ. 

“Үүсээд байгаа эмх замбараагүй байдлыг цэгцэлж, нинжа нарыг төрийн хяналтын дор нэн даруй хөөж буулгах нь чухал. Ингэхийн тулд төсөл хэрэгжүүлэгч “Сентера голд” компанид Ноён уулын ойр орчмын харуул хамгаалалтыг өндөржүүлэх үүргийг даалгавал бидэнд гарц байна” хэмээн тус ТББ-ын гишүүд үзэж байгаа аж. 

Хэвлэлийн хурлыг тасалдуулсан “Босоо хөх монгол” хөдөлгөөний төлөөлөл тус ТББ-ын дэвшүүлж байгаа дээрх саналыг эсэргүүцэн, “Нинжа болон цагдаагийн хооронд хагарал үүсгэхээр санаатай турхирлаа. Гадны компанид улс орноо худалдаж байна” хэмээн нэлээдгүй маргаан дэгдээсэн юм.

Хоёр тал байгаль орчноо хамгаалах нэг зорилготой ч “Монгол байгаль дэлхийд ганц” ТББ-ын дэвшүүлж байгаа саналд “Босоо хөх монгол” бүлгэмийн гишүүд шүүмжлэлтэй хандсанаас маргаан хурцдаж, эцэстээ хэвлэлийн бага хурал өндөрлөснөөр дуусав.

Г.Тэгшсүрэн