Мьянмар улсад болсон парламентын сонгуульд Нобелийн шагналт Ан Сан Су Чигийн тэргүүлдэг “Ардчиллын төлөөх үндэсний лиг” нам ялалт байгуулж, парламентын нийт 182 суудлаас 163-д ялалт байгуулсан хэмээн тус улсын сонгуулийн ерөнхий хорооноос мэдээллээ.
Нийт сонгогчдын 90 хувь нь сөрөг хүчинд саналаа өгчээ. Сонгуулийн албан ёсны дүн ирэх долоо хоногийн сүүлээр гарах аж. Тэгвэл ирэх онд зохион байгуулагдах Ерөнхийлөгчийн сонгуульд 70 настай Ан Сан Су Чи нэр дэвшихээр болсноо албан ёсоор мэдэгдэж, ард түмнээсээ дэмжлэг хүссэн тухай “CNN” агентлаг мэдээллээ.
Тус улсын сонгуулийн хуулинд гадаад хүнтэй гэр бүл болсон, гадаад хүний хүүхэд төрүүлсэн хүнийг Ерөнхийлөгчийн сонгуульд нэр дэвшихийг хориглодог билээ. Ан Сан Су Чи “Ард түмэн хуулиас хүчтэй” гэж мэдэгджээ. Тэрбээр хагас зуун жил үргэлжилсэн цэргийн дэглэмийг түлхэн унагаахын төлөө эрчимтэй тэмцэж, Мьянмарыг хөгжингүй улс болгохоо амласан байна.
Ан Сан Су Чигийн хийсэн мэдэгдлийн дараа түүнтэй АНУ-ын Ерөнхийлөгч Барак Обама утсаар ярьж, баяр хүргэжээ. Обама “Таны хичээл зүтгэлийн үр дүн гарсанд тун баяртай байна. Америк, Мьянмар улсад бүхий л бололцоогоороо туслах болно” гэж хэлжээ.
Б.Дэлгэрцэцэг
Уншиж байна |