“Эрдэнэс Тавантолгой” компанийн “Эв санааны нэгдэл” ҮЭ-ийн дарга С.Эрдэнэ хэвлэлийн хурал хийх үеэрээ өөрийгөө шатаах үйлдэл хийсэн. Үүнтэй холбогдуулан Монгол Улсын Ерөнхий сайд Ч.Сайханбилэг “Эрдэнэс Тавантолгой” компанийн удирдлагуудыг хүлээж авч уулзаж, салбарын сайдад үүрэг өгчээ. Энэ талаар Уул уурхайн сайд Р.Жигжид мэдээлэл хийлээ. Тэрбээр:
-“Эрдэнэс Тавантолгой” компанид бүтэц, зохион байгуулалтын өөрчлөлт хийгдэж байгааг эсэргүүцэн тус компанийн “Эв санааны нэгдэл” ҮЭ-ийн дарга С.Эрдэнэ өөрийгөө шатаах үйлдэл гаргасан маш харамсалтай явдал боллоо. Тиймээс дөнгөж сая Ерөнхий сайд холбогдох байгууллагын удирдлагуудыг хүлээн авч уулзан, үүрэг өглөө. Юуны түрүүнд С.Эрдэнийн эрүүл мэндэд анхаарахыг ЭМС-ын сайдын үүрэг гүйцэтгэгч, Шадар сайд Ц.Оюунбаатарт үүрэг болголоо. Эмчилгээний зардлыг “Эрдэнэс Тавантолгой” компаниас гаргуулах нь зүйтэй гэсэн чиглэл өгсөн. Үүсээд байгаа нөхцөл байдлыг хуулийн хүрээнд түргэн шуурхай шийдвэрлэх үүрэг өгсөн. Үүнтэй холбогдуулан компанийн удирдлагыг ажлаас нь чөлөөлж, Компанийн хуулийн дагуу “Эрдэнэс Монгол” компанийн Хууль эрхзүйн асуудал эрхэлсэн захирал Т.Билэгтийг түр орлон гүйцэтгүүлэхээр томиллоо.
-Тус компанийн ажилчдад ажлын байрны баталгаа бий юу?
-Тавантолгой”-н зүүн Цанхид Австралийн, баруун Цанхид дотоодын компани үйл ажиллагаа явуулж байсан. Харин хоёр компани зардлын хувьд харилцан адилгүй үйл ажиллагаа явуулж байлаа. Тиймээс “Эрдэнэс Тавантолгой”-н хөрөнгө оруулалтын зардлыг бууруулах зорилт тавьж ажилласан. Австралийн компанитай гэрээгээ шинэчлэн ажиллах хэлэлцээ олон сарын турш явагдсан. Австралийн компани Хятадын компанид эрх үүргээ шилжүүлж, үргэлжлүүлэн үйл ажиллагаагаа явуулахаар тохирсон. Ингэснээр ажлын байр өөрчлөгдөхгүй байх тохиролцоотойгоор өөрчлөлт явагдсан. Энэ асуудлыг ажилчид, холбоо компанитайгаа хамтран шийдээд явах учиртай. Энэ чиглэлээр “Эв санааны нэгдэл” ҮЭ-тэй компанийн удирдлагууд идэвхийлэн ажиллаж байсан. Тус компанид гурван үйлдвэрчний эвлэл байдаг. “Эв санааны нэгдэл” ҮЭ шинээр байгуулагдсан. Гурван үйлдвэрчний эвлэл саналаа нэгтгээд харилцан ойлголцох шатандаа явж байсан. Уул уурхайн яам байнга анхааралдаа авч байсан. Ойрын хугацаанд асуудлаа нэгтгэж гэрээгээ байгуулна гэсэн ойлголттой байсан боловч харамсалтай үйл явдал боллоо. Ажилчдын ажлын байр баталгаатай хадгалагдана гэж ойлгож байгаа.
Н.Энх