Өнгөрсөн баасан гаригт “Эрдэнэс тавантолгой” компанийн Цогтцэций суманд дахь үйлдвэрчний эвлэлийн дарга С.Эрдэнэ хэвлэлийн хурлын үеэр өөрийгөө шатааж, нийгмийг цочролд оруулсан. “Түвдүүд зулын гол боллоо” гэсэн мэдээг сонсч, үзэж байсан бидэнд бодитоор тохиосон энэ үйлдэл таатай санагдаагүй. Тэмцэл хийж болох ч хэлбэр нь зохисгүй байсныг хэлэхэд илүүдэхгүй. Дахин давтахыг, давтагдахыг хүсэх зүйл биш гэдгийг хэн хүнгүй мэдэж буй. Гэтэл өчигдөр “Эрдэнэс тавантолгой” компанийн “Эв санаа эв нэгдэл” үйлдвэрчний эвлэлийн гишүүн А.Батаа, “Иргэдийн шударга шүүх” ТББ-ын тэргүүн Х.Бат-Ялалт, “Хөх Монгол” бүлгэмийн тэргүүн Д.Гансүрэн нар “Монгол ньюс” мэдээллийн төвд хэвлэлийн хурал хийж, С.Эрдэнийн үйл хэргийг үргэлжлүүлэхээ мэдэгдэв. Түүний тэмцлийг бүр өөрийгөө шатаасан үйлдлийг нь ч үргэлжлүүлэх утгатай зүйл ярьсан нь зохисгүй зүйлийг дэмжсэн шинжтэй байлаа.
“Иргэний шударга шүүх” ТББ-ын тэргүүн Х.Бат-Ялалт “Үнэхээр Монгол Улсын өнөөгийн байдал хүнд байна. Ерөнхий сайд, УИХ-ын дарга, Дээд шүүх гээд төр засгийн байгууллагад бичиг хүргүүлдэг. Хариу ирдэггүй. Төр засгийн энэ дүлий байдлыг хараад бид ч гэсэн чулуу шидмээр, шатаамаар санагддаг” гэв. Харин “Хөх Монгол” бүлгэмийн тэргүүн Д.Гансүрэн бүр “Магадгүй дахиад ийм үйлдэл гарахыг үгүйсгэхгүй” гэж байх юм.
Үгийг нь сонссонгүй гээд өөрийгөө шатаадаг “аян” өрнүүлмээргүй байна. Тэгээд ч энэ амныхаа зоргоор яриад байх зохистой зүйл биш. Хэлэх үг, хийх үйлдэлдээ эрүүл ухаанаар хандахгүй бол өөрийгөө золиос, өрөөлийг хэрэгтэн болгохоос цаашгүй. Хамгийн чухал нь төрд данстай байгууллага удирдаж, тэрүүгээрээ дамжуулан олон нийтэд дуу хоолойгоо хүргэдэг хүмүүс бусдыг турхирсан, зохисгүй үйлдлийг өөгшүүлж, дахин давтах тухай ярьж болохгүй. Энэ тоглоом биш.
Бид чөлөөт нийгэмд амьдарч буй. Хэлэх үг, хийх үйлдэл нь Д.Гансүрэн, Х.Бат-Ялалт нарын эрхийн асуудал. Тэглээ гээд хэм хэмжээ, хязгаарыг давах ёсгүй. Өөрийгөө шатаасан нэгнийг өөгшүүлж, дахин давтахад ч буруудахгүй гэх яриа баатарлаг харагдуулж, тэгэж ярьснаар баатар болгохгүй. Гуравхан сая хүн амтай Монголд өөрийгөө шатаадаг тэмцэл, шатаахыг өөгшүүлдэг иргэний нийгмийн байгууллага байж болохгүй.
Төрд болж бүтэхгүй зүйл, шийдвэр гарахгүй асуудал, урагшгүй ажил зөндөө бий. Х.Бат-Ялалтын хэлдгээр төрийн энэ дүлий байдал миний бус гэхэд хэн нэгний амьдралд нөлөөлж, сүүдрээ тусгаж буй. Тэр болгоныг тэмцэл болгож, эцэст нь өөр аргагүй гэж өөрийгөө шатааж, хөөрхийлөлтэй харагдуулах шаардлагагүй. Энэ зохисгүй үйлдлийг нь уухайлж, уриалж, дэмжиж бүр болохгүйг эрүүл ухаантай хүн бүр мэдэж, үр дагаврыг нь ойлгож байгаа. Уриалах, уухайлах зүйл гэж тусдаа бий.
В.Хэрлэн