Оросын байлдааны “Су 24” онгоцыг Туркийн хилийг зөрчсөн учир устгасан хэмээн тус улсын Батлан хамгаалах яамнаас мэдээлсэн билээ. Онгоц дэлбэрэхээс өмнө нисгэгчид гарч амжсан юм. Тэд шүхрээр газардахь үед босогчид нэг нисгэгчийг буудан хороожээ. Харин нэг нисгэгч амжилттай зугтааж, Сирийн армийн тусламжтай Латикиа хотноо байрлаж буй Оросын цэргийн баазад очсон байна. Нисгэгчийг аврахын тулд хоёр улсын тусгайгийнхан 12 цагийг зарцуулжээ.

Ослоос амьд үлдсэн Оросын нисгэгч Константин Мурахтин “Россия 1” телевизэд ярилцлага өгөх үеэрээ “Туркийн сөнөөгч онгоц бидэнд анхааруулга өгөөгүй шууд галласан” гэж хэлжээ.

Тэрбээр “Туркууд ямар ч анхааруулга өгөөгүй. Би энэ удаагийн нислэгийг удирдаж байсан. Бид 6000 метрийн өндөрт нислэг үйлдэж байсан. Туркийн сөнөөгч онгоц гэнэт л бидний хойно гарч ирсэн. Тэгээд л галласан. Байрлалаа өөрчлөх боломжгүй байсан. Бид Туркийн хилийг зөрчөөгүй. Энэ бол баталгаатай үнэн. Бид Сирийн газар нутагт нислэг үйлдэж байсан. Бид өдөрт олон удаа хэт даврагчдад цохилт өгөхөөр энэ бүс нутгаар нислэг үйлддэг. Тиймээс бид байршлыг гарын хуруу шигээ мэдэж байна” гэж хэлжээ. Нисгэгч ярилцлага өгөхдөө гадаад төрхөө нууцалж, зураглаачид түүний араас бичлэг хийсэн байна.

“Су 24” онгоц Туркийн хилийг зөрчөөд 17 секунт болсон учир гал нээсэн гэв. Нисгэгчийн ярилцлагын дараа Туркийн тал “Су 24” онгоцонд анхааруулга өгч буй бичлэгээ интернэтэд байршуулжээ. Тус бичлэгт Туркийн нисгэгч “Та Туркийн хилийг зөвшөөрөлгүй давлаа” хэмээн анхааруулж байгаа нь бичигджээ. 

Б.Дэлгэрцэцэг