Ардчилсан намын гишүүд дэмжигчдийн холбооны тэргүүн Т.Хасбаатар мэдээлэл хийлээ. Тэрбээр МАН-ын удирдлагууд, өнгөрсөн зууны төр нийгмийн зүтгэлтнүүдийн улс төрд хийж бүтээсэн алдар гавьяаг гуйвуулж, улс төрийн зорилгоор ашиглаж байна. Тиймээс энэ үйлдлээ нэн даруй зогсоохыг шаардаж МАН-ын дарга М.Энхболдод шаардлага хүргүүлж буйгаа мэдэгдэв.
Шаардлагад “Х.Чойбалсан, Ю.Цэдэнбал, Ж.Батмөнх нарын нийгэмд гүйцэтгэсэн ажил үүргийг одоогийн МАН-ын гишүүд тэмдэглэж бахархах нь зүйтэй ч түүхийг гуйвуулж өөрсдийн хийсэн үйл хэрэг мэтээр илэрхийлж, олон нийтийн оюун санаанд нөлөөлж буй нь бусармаг үйлдэл” хэмээсэн байна. Мөн тус намын гишүүдийг хойшид улс төрийн үйл хэргийг зохион байгуулахдаа ёс зүйтэй хандахыг шаардаж буйгаа тусгажээ.
Т.Хасбаатар “МАН-ын удирдлагууд түүхийг илт гуйвуулсан, улс төрийн нэрт зүтгэлтнүүдийн алдар гавьяаг өөрсдөө хийж бүтээсэн мэт ярьж байгаа ёс суртахуунгүй үйл хэргээ даруй зогсоож, Монголын ард түмнээс уучлалт гуйх ёстой” хэмээв. Шаардлагыг хүлээж аваагүй тохиолдолд МАН-ыг ирэх оны УИХ-ын сонгуульд оролцуулахгүй, татан буулгах асуудлаар Улсын Дээд шүүхэд хандахаа мэдэгдлээ.
Г.Тэгшсүрэн
Уншиж байна |