Бүгд Найрамдах Солонгос Улс ын 44 дэх Ерөнхий сайд Хван Гё Ан Монгол Улсын Ерөнхий сайд Ч.Сайханбилэгийн урилгаар манай улсад албан ёсны айлчлал хийж байна. Түүнийг дөнгөж сая Ерөнхий сайд Ч.Сайханбилэг болон Засгийн газрын гишүүд албан ёсоор угтан авлаа.

Хоёр улсын Ерөнхий сайд нар албан ёсны хэлэлцээ хийнэ. Мөн энэ айлчлалаар  хоёр орны зам тээвэр, аж үйлдвэр, эрчим хүчний салбарт хамтран ажиллах тухай баримт бичгүүдийг байгуулж, бүс нутаг болон олон улсын тавцан дахь хамтын ажиллагааны харилцан сонирхсон асуудлуудаар санал солилцоно.

Айлчлалын үеэр БНСУ-ын Ерөнхий сайд Хван Гё Ан Монгол Улсын Ерөнхийлөгч Ц.Элбэгдорж, УИХ-ын дарга З.Энхболд нарт бараалхана.

Энэхүү айлчлал нь БНСУ-ын Ерөнхий сайд Ли Хан Дон 2001 онд манай улсад айлчилснаас хойш 14 жилийн дараа хийгдэж буй хоёр дахь удаагийн айлчлал аж.