УИХ-ын дарга З.Энхболд ипотекийн зээлийн асуудлаар Монгол банкны Ерөнхийлөгч Н.Золжаргал,  МИК-ийн захирал н.Гантөгс нарыг байлцуулан албан өрөөндөө сэтгүүлчдэд мэдээлэл хийлээ. Ипотекийн зээлийн  урьдчилгаа 30 хувийг 10 хувь болгохоор яригдсан байсан. Харин тооцоо судалгааг үндэслэн орон сууцны ипотекийн зээлийн урьдчилгааг 20 хувь болгож, жилийн 8 хувийн хүүг бууруулах боломжтой гэж үзжээ. Тиймээс энэ оны нэгдүгээр сараас орон сууцны ипотекийн зээлийн урьдчилгаа төлбөр 20 хувь болж,  хүү нь жилийн 5  хувь болох боломжтой  гэж үзжээ. Учир нь инфляци 14 хувь байхад ипотекийн зээлийн хүү жилийн  8 хувьтай байсан. Өнөөдөр инфляци буурсан.  Тиймээс жилийн найман хувийн хүүтэй олгогдож ирсэн орон сууцны ипотекийн зээлийн хүүг 5 хувиар тогтоох боломж бүрдсэн тухай Монголбанкны ерөнхийлөгч Н.Золжаргал онцоллоо.

Ипотекийн зээлийн хүү 5 хувь болж буурснаар шинээр байр хүсэх иргэдийн хувьд хэт өндөр орлого шаардахгүй аж.  Учир нь 1м2 нь 1,350 сая төгрөгийн үнэтэй 60 м2 байр авах болоход урьдчилгаа 30 хувиа төлсөн нөхцөлд сарынх нь орлого 1 сая төгрөг орчим байхад банкнаас тавих шаардлагыг хангаж буй аж. Энэ нөхцөлд илүү олон өрхийг байрны зээлд хамруулах боломжтой бүрдэх гэнэ.

ҮХЦ-ийн 13 дугаар дүгнэлттэй холбогдуулж арилжааны банкууд ипотекийн зээлээ зогсоосон. УИХ энэ асуудлыг шийдвэрлэх эрх зүйн орчинг Цагаас сарын өмнө  бүрдүүлэх юм байна.  УИХ-ын дарга З.Энхболдтой хамтарч уулзалт  хийснийхээ дараа МБХ-ны Ерөнхийлөгч Ж.Үнэнбат мэдээлэл хийсэн юм. Тэрбээр:

-УИХ-ын даргатай банкуудын төлөөлөл уулзлаа. ҮХЦ-ийн өнгөрсөн оны 12 дугаар сарын 9-ний дүгнэлт бол банкууд ипотекийн зээлийг  цааш нь үргэлжлүүлэх боломжгүй болгосон. Үүнээс гарах гарцын талаар бид ярилцлаа. Иргэний хуулийн 171.2-т хүчингүй болгосон  нь банкинд эрсдэл авчирсан. Банк гэдэг нь хадгаламж эзэмшигчдийн мөнгөн хуримтлалаас бүрдсэн газар. Хадгаламж эзэмшигчдийн мөнгөн хөрөнгийг эрсдэлд оруулахгүй байх үүргийг хүлээдэг. Тиймээс эрсдэлтэй зээлийг олгож болохгүй. Харин ипотекийн зээлийг үргэлжлүүлэх гарц нь Иргэний хуульд өөрчлөлт оруулах асуудал гэдгийг талууд зөвшилцсөн. Иргэний хуульд “Барьцааны хөрөнгийг гуравдагч этгээдийн өмчлөлд шилжүүлдэг зохицуулалтыг  байхгүй болгох” өөрчлөлтийг оруулахаар санал нэгдсэн хэмээв.

Н.Энх