Шинэ үндсэн хууль баталсны 24 жилийн ойн барилдаан өчигдөр Монгол бөхийн өргөөнөө боллоо. Улс, аймаг, цэргийн алдар цолтой хүчит 224 бөхийн барилдаанд Увс аймгийн Ховд сумын харьяат улсын арслан Н.Батсуурь найм даван түрүүлж, Архангай аймгийн Хашаат сумын харьяат улсын заан Ч.Санжаадамба үзүүрлэсэн юм.
Их шөвөгт Увс аймгийн Баруунтуруун сумын харьяат улсын аварга С.Мөнхбат, Ховд аймгийн Чандмань сумын харьяат улсын харцага Б.Пүрэвсайхан нар тунан үлдсэн.
Ардчилсан шинэ Үндсэн хууль батлагдсаны 24 жилийн ойд зориулсан үндэсний бөхийн барилдааныг Улсын Их Хурлын дарга З.Энхболд, дэд дарга Л.Цог, Монгол Улсын Хөдөлмөрийн баатар, дархан аварга Х.Баянмөнх, МАХН-ын дарга Н.Энхбаяр, МҮБХ-ны тэргүүн Р.Нямдорж, дэд тэргүүн Д.Данзан болон албаны бусад хүмүүс үзлээ. Монгол бөхөө дээдэлдэг, бөхийг шимтэн сонирхогчид Монгол бөхийн өргөөнөө хуран цуглаж бөхийн барилдааныг үзэж сонирхлоо.
Б.Бэхи
Уншиж байна |