АНУ-ын Ерөнхийлөгч Барак Обама болон ОХУ-ын Ерөнхийлөгч В.Путин нар зургаан сарын дараа анх удаагаа утсаар ярьсан талаар “TASS” агентлаг мэдээллээ. Удирдагчид Украин, Сирийн хямрал, Хойд Солонгосын цөмийн хөтөлбөр, Ойрхи Дорнодод өрнөж буй терроризм, Сирийн Ерөнхийлөгч Башар аль Ассадын талаар ярилцсан хэмээн Кремлийн хэвлэлийн албанаас мэдээлсэн байна.
Тэд цаг орчим ярилцсан аж. Ярианы төгсгөлд “Нормандын дөрвөл”-ийн байгуулсан Минскийн гэрээний хэрэгжилт болон сөргөлдөөний бүсийн өнөөгийн нөхцөл байдлын талаар ярилцсан хэмээн Цагаан ордны хэвлэлийн алба уламжлав.
Путин “Украины зүүн хязгаар буюу сөргөлдөөний бүс харьцангуй тайван болсон” гэсэн бол Обама “Нормандын дөрвөл” дахин хуралдаж, “Минск 2” гэрээний хэрэгжилтийн талаар ярилцах нь зөв” хэмээн мэдэгджээ.
Өнгөрсөн оны наймдугаар сарын 14-ны өдөр удирдагчид Сирийн хямрал, Ассадын дэглэмийн асуудлаар ярилцсан юм. Обама, Путин нар өнгөрсөн онд Турк болон Францад биечлэн уулзаж, цаг үеийн асуудлаар байр сууриа солилцсон билээ.
Б.Дэлгэрцэцэг
| Уншиж байна |