Сангийн сайд Б. Болор, Азийн Хөгжлийн Банкны Монгол Улс дахь Суурин төлөөлөгч Роберт Шоэллхаммэр нар ирэх мягмар гаригт хэд хэдэн төслийн гэрээнд гарын үсэг зурна. Гарын үсэг зурах ёслол мягмар гаригийн 14.00 цагт Монгол-Японы төвд болно. Азийн Хөгжлийн Банкны санхүүжилттэй хэрэгжих дараах төслүүдийн гэрээнд гарын үсэг зурна. 

Тодруулбал: 

“Хөвсгөл нуурын байгалийн цогцолбор газарт иргэдийн амьжиргааг дээшлүүлэх, аялал жуулчлалыг тогтвортой хөгжүүлэх” 

“Баруун бүсийн бага сургуулийн дотуур байрны орчинг сайжруулах” 

“Төлбөрийн чадварт нийцсэн орон сууц төслийн бэлтгэл ажлыг хангах” төслүүдийг баталгаажуулах юм.

Эдгээр төслүүдийн нийт санхүүжилт нь 7 сая ам.доллар бөгөөд эх үүсвэр нь Япон Улсын Засгийн Газрын Ядуурлыг Бууруулах Япон Сангийн буцалтгүй тусламж юм.   

Ёслолын ажиллагаанд Япон Улсаас Монгол Улсад суугаа Онц бөгөөд бүрэн эрхт Элчин сайд Такенори Шимизү, Байгаль орчин ногоон хөгжил аялал жуулчлалын сайд Н. Батцэрэг, Боловсрол соёл шинжлэх ухааны сайд Л.Гантөмөр, Улаанбаатар хотын дэд дарга С.Очирбат болон албаны бусад хүмүүс оролцоно. 

В.Бат