УИХ-ын чуулганы нэгдсэн хуралдаанаар .“Зарим газар нутгийг улсын тусгай хамгаалалтад авах тухай” УИХ-ын тогтоолын төслийн эцсийн хэлэлцүүлгийг хийлээ.  Энэ тогтоолоор Ноён уулыг тойрсон  байгалийн нөөц бүхий 11 мянган га газрыг улсын тусгай хамгаалалтад авах юм.

Эрт үеэс Ноён уул хэмээн хүндэтгэн нэрлэгдсэн тус уулын Сүжигт, Зурамт, Хужирт хэмээх гурван аманд Хүннүгийн язгууртны булш бүхий томоохон дурсгал оршдог болох нь судалгаагаар тогтоогдсон.

Ноён уул орчмын газар нутгийг байгалийн нөөц газар болон дурсгалт газрын ангилалаар улсын тусгай хамгаалалттай газрын сүлжээнд хамруулж байгаа ба газар нутгийн хамгаалалт, менежментийг Тусгай хамгаалалттай газар нутгийн тухай хуулийн холбогдох заалтын дагуу тухайн шатны Засаг даргын бүрэн эрхийн хүрээнд зохицуулагдахаар тусгагдсан тул холбогдох аймаг, сумдын байгаль орчны албад уг арга хэмжээг хэрэгжүүлэх болно.

 Хэлэлцэж байгаа асуудалтай холбогдуулан гишүүдийн асуултад Байгаль орчин хүнс, хөдөө аж ахуйн байнгын хорооны дарга Л.Эрдэнэчимэг хариулсан юм.

УИХ-ын гишүүн Б.Бат-Эрдэнэ:

-Монгол  орны байгаль цаг уур маш эмзэг. Тиймээс монголчууд олон мянган жил байгаль цаг уураа таньж, зохицож амьдарч ирсэн ард түмэн. Сүүлийн жилд ашиг орлого хайж, нийтийн эзэмшжлийн өмчийг цөлмөж дуусах бодлого төр явуулж байна. Засгийн газар Ноён уул орчмын 37 мянган га-гаар нь улсын тусгай хамгаалалтад авсан бол болох байлаа.

-Бид эрх мэдлийнхээ хүрээнд Батсүмбэр сумыг нэмж оруулаад дэмжүүлсэн. Дархан цаазат болон байгалийн цогцолборт газраар нь өргөн барих бүрэн боломжтой. Засгийн газраас орж ирсэн тогтоолыг өөрчлөх боломжгүй.

УИХ-ын гишүүн Г.Уянга:

-Бид маш өндөр үнээр Сэнтеррад 50 тонн алтаа өгч байна. Ноён уулыг та нар өршөөж байна. Өнгөрсөн 25 жилд өмнөх үеийнхээ, эцэг эхийнхээ бүтээсэн зүйлийг нураалаа. Одоо ганцхан түүхийг үлдээгээд өгөөч гэж гуйж байгаа юм. Хэрвээ Ноён уулыг бүрэн бүтнээр нь авч үлдээвэл 78 мянган га газар хамгаалалтад авах ёстой. Алтны нөөц нь 150 тонн байгаа.

Ингээд Ноён уулыг улсын тусгай хамгаалалтад авах тухай УИХ-ын тогтоолын төслийг батлах санал хураалт явууллаа. Гишүүдийн олонхийн саналаар уг тогтоолын төслийг дэмжин батлав.

Одоо чуулганы хуралдаанаар Гацууртын ордын төрийн эзэмших хувийг тогтоох тухай хуулийн төслийг хэлэлцэж эхлэв. Чуулганы хуралдаан үргэлжилж байна.

Н.Энх