Баянзүрх дүүргийн Засаг дарга Д.Пүрэвдаваа тус дүүргийн Хүүхэд, гэр бүл хөгжлийн төвийн дарга Н.Эрдэнийг зодсон. Зодуулсан эмэгтэй жирэмсэн бөгөөд улмаар биеийн байдал муудсан тухай хэвлэл мэдээллийн хэрэгслээр мэдээллэсэн билээ. Үүнтэй холбогдуулан Д.Пүрэвдаваа өнөөдөр сэтгүүлчдэд мэдээлэл хийлээ. Тэрбээр “Би амьдралдаа эмэгтэй хүнд гар хүрч үзээгүй. Н.Эрдэнэ огт үндэслэлгүй худал зүйл ярьж зохион байгуулалттайгаар нэр хүндэд халдаж байна. Энэ цаг үед Улс орон даяар улс төржиж байгаа учраас түүний энэ үйлдэл ч зохион байгуулалттай халдлага байж болох юм. Гэхдээ би түүнийг ийм үйлдэл зохион байгуулсан гэж үзэхгүй байна. Тодорхой шалтаг, шалтгаан бий болов уу. Хүүхэд, гэр бүл хөгжлийн төвийн даргын албан тушаал хашиж байхдаа Н.Эрдэнэ алдаа дутагдал их гаргасан байдаг. Ажилчдынхаа цалинг хасч, өвчтэй байгаа ажилтандаа хүртэл арга хэмжээ авч байсан байдаг. Тиймээс ч удирдлагад нь ажилладаг хүмүүс хамтран ажиллах боломжгүй тул зохих арга хэмжээ авч өгөхийг хүсч өргөдөл бичиж байсан. Үүнээс үүдэн 2015 оны тавдугаар сарын 20-ны өдөр гэрээгээр хүлээсэн үүргээ биелүүлээгүй, ажлын хариуцлага алдсан гэдэг шалтгаанаар Н.Эрдэнийг тус төвийн ахлах мэргэжилтэн болгож албан тушаалыг нь бууруулах шийдвэрийг гаргасан” хэмээв.
Д.Пүрэвдаваа мэдээлэл хийснийхээ дараа сэтгүүлчдийн сонирхсон асуултад хариулав.
-Үүссэн нөхцөл байдлын талаар тодруулахаар ирсэн сэтгүүлчийг “Мөнгөтэй талд нь үйлчилдэг” гэж хэлсэн. Тэгсэн хэр нь өнөөдөр хэвлэлийн хурал зарласныг юу гэж ойлгох вэ?
-Нэгдсэн албан ёсны тайлбар өгөхийг хүссэн. Тэгээд ч тэр сэтгүүлчид өрөөнд орж ирээд “Захиалсан хүн маань явуулсан юм” гээд өөрсдөө хоорондоо яриад байсан.
-Н.Эрдэнийн зүгээс ажил үүргийн олон шаардлага тавьдаг ч хүлээж авдаггүй. Үүнээс үүдэн бидний дунд маргаан үүссэн гэдэг зүйлийг хэлж байна.
-Ямар нэгэн байдлаар тухайн байгууллагын төсвийг захиран зарцуулахад дүүргийн Засаг дарга оролцдоггүй юм. Хүүхэд, гэр бүл хөгжлийн төвийн төсөв ИТХ-аар батлагддаг. Би тус төвийн үйл ажиллагаанд нь тусласан уу гэхээс буруу үйлдэл, шийдвэр гаргаж байгаагүй. Н.Эрдэнэ гэдэг хүн Хүүхэд, гэр бүл хөгжлийн төв байгуулагдсанаас хойш 2 жил гаруй ажилласан байгаа юм. Тухайн албыг авч явахдаа алдаа дутагдал олон гаргаж байсан. Тиймээс л ажлаас нь халаагүй, албан тушаалыг нь бууруулсан хэрэг.
-Тэр таныг урьд нь төрийн албанд ажиллаж үзээгүй болохоор ажилчидтайгаа ёс зүйгүй харьцдаг гэсэн?
-Би хоёр даргатай хүн. Нэг нь манай дүүргийн Иргэдийн хурлын дарга, нөгөө нь Нийслэлийн Засаг дарга Э.Бат-Үүл. Хэрэв би энэ албан тушаалд тэнцэхгүй, багтахгүй байсан бол төрийн байгууллагууд халах шийдвэрээ гаргах ёстой. Мөн нэг зүйлийг хэлэхэд, Хүүхэд, гэр бүл хөгжлийн төвийн албан хаагчдыг би оройн цагаар аль нэг албан тушаалтантай уулз гэж нэг ч удаа шахаж шаардаж байгаагүй гэдгийг албан ёсоор хэлье. Би мэргэжилтэнтэй холбогдож ажилладаггүй. Намайг төрийн албанд ажиллаж байсан эсэхийг хууль хяналтын байгууллагаар тогтоолгоорой.
-Асуудал гарснаас хойш та Н.Эрдэнэтэй уулзсан уу?
-Н.Эрдэнэ эрүүл, саруул ажлаа хийгээд л явж байгаа.
-Зохион байгуулалттай халдлага гэлээ. Захиалагч нь хэн гэж хардаж байгаа юм бэ?
-Нэгдүгээр сарын 28-нд болсон үйл явдлыг цагаан сарын өмнө ярьж болох байсан. Тэгсэн яагаад өнөөдөр энэ асуудлыг сөхөж гаргаж ирэв. Тэгэхээр би хувьдаа энэ бол цэвэр сонгуулийн, улс төрийн үйл явц эхэлж байна гэж таамаглаж байна.
-Н.Эрдэнэ аль намын хүн бэ?
-Уг нь манай л намын хүн.
Г.Тэгшсүрэн