УИХ-ын гишүүн О.Баасанхүү мэдээлэл хийлээ. Тэрбээр Ерөнхий сайд Ч.Сайханбилэгийг 3 дугаар сарын 12-ны өдрийн 19:00 цагт халз мэтгэлцээнд урьсан. Харин Ерөнхий сайд Ч.Сайханбилэг түүний урилгыг зөвшөөрсөн эсэхээ өнөөдрийг хүртэл мэдэгдээгүй байгаа аж. МҮОНТВ-ийн зүгээс ч халз мэтгэлцээн явуулах эфирийн цаг гаргаж өгөх эсэхээ хариу мэдэгдээгүй байгаа гэнэ. Гэхдээ ТҮ-5 телевизийн мэтгэлцээн явагдвал цаг гаргаж өгөхөд бэлэн гэдгээ мэдэгджээ. УИХ-ын гишүүн О.Баасанхүү “Ерөнхий сайд мэтгэлцээнд оролцохоо надад хариу ирүүлээгүй байна. Би бодлогоор мэтгэлцье гэсэн. Хуримтлалын сан бүрдүүлэх, Хот тосгоны эрхзүйн байдлын тухай хуулиар мэтгэлцэнэ. Ерөнхий сайд хүн томилогдонгуутаа хоёр хөрш орон эсвэл хөдөө орон нутагт томилолтоор явдаг. Гэтэл энэ хүн аль алиныг нь хэрэгжүүлсэнгүй. Мянган тэмээний баяр гэхэд болоход УИХ-ын дарга З.Энхболд Өвөрхангайд очиж, 5 хувийн хүүтэй ипотекийн зээлийн хэрэгжилтийг танилцуулсан байна. Тиймээс Ерөнхий сайдын ажлыг Ч.Сайханбилэг биш З.Энхболд удирдан хийгээд байна уу гэсэн бодол төрж байгаа. Хүсэлт гаргаснаас хойш 30 хоногийн дотор Ерөнхий сайд хариу өгөх ёстой. Хэрвээ хариу өгөхгүй бол түүнийг мэтгэлцээнд оролцохоо илэрхийлж байна гэж ойлгож хүлээж авч байна” гэлээ.
Н.Энх
Уншиж байна |