Өнөөдөр Улсын Дээд Шүүх дээр Хөдөлмөрийн Үндэсний намын даргыг бүртгэх үйл ажиллагаа болно. Энэ явдалтай холбогдуулан Хөдөлмөрийн Үндэсний намын 18 аймаг,  9 дүүргийн  анхан шатны дарга, тэргүүлэгчид хэвлэлийн бага хурал хийлээ. Баян-Өлгий, Говь-Алтайгаас эхлээд Хан-Уул, Сонгинохайрхан дүүргийн намын хорооны дарга энэхүү хэвлэлийн хуралд хүрэлцэн ирсэн юм. Ингээд Баян-Өлгий ХҮН-ын дарга Б.Кеншиликээс цөөн асуултад хариулт авлаа.

-Хөдөлмөрийн Үндэсний нам хоёр даргатай болчихоод байна уу?

-Миний ойлгож байгаагаар Хөдөлмөрийн Үндэсний нам ганцхан С.Ганбаатар гэдэг даргатай. Дахиад нэг намтай, даргатай болчихсон гэх мэдээллийг  олныг төөрөгдүүлэх гэж явуулга гэж харж байгаа.  Ардчиллын зарчим бол олонхиороо асуудлаа шийддэг ч цөөнхөө хүндэтгэх учиртай. Цөөнхийг саналыг хүндэтгэх учиртай ч арав хүрэхгүй хүний хийж байгаа бусармаг ажил олныг төөрөгдүүлэх, үймүүлэх учиргүй.

- Хөдөлмөрийн Үндэсний нам дээр үүссэн нөхцөл байдлыг хүндрүүлэх зорилгоор Улсын Дээд шүүх нөгөө талд шийдвэр гаргавал яах бэ?

-Улсын дээд шүүх талцуулсан шийдвэр гаргахгүй. Шударга ёсны төлөө тангараг өргөсөн шүүгч нар бусад улс төрийн хүчний захиалгаар буруу шийдвэр гаргавал хэн итгэх юм бэ. Тийм шийдвэргүй гаргахгүй гэж итгэж байна.

-Баян-Өлгий аймагт ХҮН хэдэн гишүүнтэй болсон бэ?

-Баян-Өлгий аймагт ХҮН нам байгуулагдаад удаагүй  байгаа хэдий ч 600 орчим гишүүдтэй болоод байна. Манай намаас гарсан нөхдийн буруу, найз нөхдөөсөө урвасан,  зөрүү мэдээллээс болоод эргэлзсэн хүмүүс ч  таарах боллоо. Миний хувьд энэ бүхнийг мухарлаад намын гишүүд болон олон нийтэд хэлэх мэдээлэлтэй очно гэж найдаж байна.

-Маргаашийн Дээд шүүхээс гарах шийдвэрийг хэлж байгаа гэж ойлголоо?

-Тиймээ. Шүүхэд эрх баригч намуудын нөлөөлөл орчихгүй бол шийдвэр нь шударга гарна гэдэгт итгэж байгаа. Тэгээд ч бүх гишүүдийн хурлаар сонгогдож хүлээн зөвшөөрөгдсөн ганцхан дарга бол С.Ганбаатар шүү дээ.