БНХАУ-ын Хэбэй мужийн Чань-Ань хотноо р "Рио-2016" олимпийн наадмын эрх олгох Ази, Номхон далайн бүсийн боксын тэмцээн болж байгаа билээ. Тэгвэл өчигдөр манай таван тамирчин хагас шигшээн тулааны хийсэн юм. Тэр дундаас Д.Отгондалай, Б.Чинзориг нар өрсөлдөгчөө ялж, Олимпийн эрхээ авлаа. 

 

64 кг-ын жинд хүч үзсэн Армийн дэлхийн аварга, ОУХМ Баатарсүхийн Чинзориг Киргизстаны Эрмек Сакеновыг 3:0-ээр  хожсоноор "Рио-2016" Олимпийн наадамд оролцох ширэн бээлийтнүүдийн анхны эрхийг эх орондоо авчирсан.  Мөн Азийн наадмын аварга Д.Отгондалай Японы Д.Наримацутай хүч үзэн 3:0 ээр ялалт байгуулан мөнгөн медалийг, Олимпын эрхийн хамт авлаа. Манай хоёр тамирчин маргааш аваргын төлөө тулалдана.

Тэгвэл 75 кг-д дэлхийн Универсиад наадмын хүрэл, Азийн Залуучуудын аваргын хүрэл, Нармандахын Шинэбаяр хагас шигшээд дэлхийн аварга Казакстаны Жанебек Алимханулытай өрсөлдөж 3:0-ээр ялагдсан юм. Мөн 69 кг-ын жинд Б.Түвшинбат Тайландын боксчинд 1:2, 49 кг-ын жинд Г.Ган-Эрдэнэ Узбекстаны Х.Дусматовт 3:0 ээр ялагдлаа. Гэхдээ Олимпийн эрх авах найдвар дуусчихаагүй байна. Өнөөдөр манай гурван тамирчин Риогийн Олимпийн эрхийн төлөө нэмэлт тоглолт хийнэ. 

49 кг-ын жинд тулалдаж буй Г.Ган-Эрдэнэ Олимпийн эрхийн төлөө Энэтхэгийн тамирчин  Девендро Лайшрамтай тулалдах юм. Харин 75 кг-ын жинд өрсөлдөж буй Н.Шинэбаяр олимпийн эрхийн төлөө  Австралийн Дэниел Льюистэй тулах юм. Манай тамирчдын тулаан Улаанбаатар цагаар 15:00 цагт эхэлнэ. Тэгвэл 19:00 цагт 69 кг-д өрсөлдөж буй Б.Түвшинбат Филиппины Эумир Марсиалтай Олимпийн эрхийн төлөө тулалдана.