Ардчилсан нам үүсэн байгуулагдсаны 26 ойгоо энэ өдрүүдэд тэмдэглэж байна. Өнгөрсөн хугацаанд энэ нам төр, засгийн эрхийг хоёронтоо атгаж, өнөөдөр парламентад олуулаа, Ерөнхийлөгч, УИХ, Засгийн газар гэсэн төрийн жолоог атгаж, Монголын улс төрийн том хүчин болсон түүхэн амжилт ололтойгоор ойгоо угтаж байгаа. Гэхдээ өнгөрсөн хугацаанд алдаа оноо аль аль нь байсан. Ойн энэ өдрүүдэд амжилт ололтоо онцлохын зэрэгцээ алдаа оноогоо ч дүгнэн хэлэлцэхээр зорьсон нь маргааш их тэнгэрт зохион байгуулагдах АН-ын бүлгийн өргөтгөсөн хуралдаанаас харагдана.
Маргаашийн өөхнөөс өнөөдрийн уушги гэгчээр АН-д хэтийн урт хугацааны бодлогоос илүүтэй өнөөдөр эв эеэ хичээн сахих нь туйлын эрхэм, үгүйлэгдсэн сахилга бат болоод байгаа.
АН өнгөрсөн хугацаанд фракц хоорондын зөрчил тэмцлээсээ салж чадаагүй нь чин үнэн хийгээд намын ялалт, нэр хүндэд фракц хоорондын зөрчил сөргөөр нөлөөлсөөр ирсэн. МАН дотоод асуудлаа тогооноосоо халиадагүй бол АН дотоод асуудлаа дотроосоо хальж, тогоогоо түлдэг гэм биш зантай. Цаашид нэг зорилго, нэгдсэн бодлоготой байхын тулд муу зуршлыг арилгаж шаардлагатайг түмэнтээ мэдэрсэн УИХ-ын дарга З.Энхболд намын даргаар томилогдон тамгаа гардан авсны дараа “Ардчилсан нам фракцгүй байх болно” хэмээн уриа дэвшүүлэн хэдий ч одоогоор лоозон төдий байна.
Олон жил явж ирсэн фракц, бүлэглэлийн зөрчил намын даргын хэлсэн төдийд илааршсангүй, асуудал үүсэх төдийд бүлэглэлүүдийн амбиц сэдэрч байна. “АН фракцаас сална гэдэг үлгэр” гэж басах нэгэн ч байх шиг. Ямартай ч цаг хугацаа шаардлагатай бололтой. Тэртээх 1990-ээд он байтугай 2000 оны жишээг ч татан дурдахаа больё. Гишүүдийнх нь өнөөдрийн үйл хөдлөлийг л харахад хоёрхон сарын дараа болох сонгуульд бэлэн үү гэж гайхширмаар.
Нэг хэсэг нь жагсаал цуглаан зохион байгуулж, олон нийтэд хандан намаасаа сонгож болохгүй эрхмүүдийг нэрлэж, нөгөө хэсэг нь өөрийн намаас сонгогдсон төрийн тэргүүнээ хуйвалдааны загалмайлсан эцгээр тодруулж, цаашлаад жирийн гишүүд нь намын дарга руугаа оймс шидэж олон нийтэд сонгуулийн өмнө намынхаа рейтингийг санамсаргүй бус санаатайгаар сөргүүлж байх шиг. Энэ бүхнийг өнгөрсөн хугацаанд нам ардчилалтай байгаагийн илрэл гэдэг үгээр халхавчилдаг байсан. Харин өнөөдөр нам ардчилалтай бус ардчиллаа өөрсдөө нурааж байгааг олон нийт шүүмжлэх болсон билээ.
Үнэндээ АН өнөөдөр эв нэгдэл туйлаас үгүйлэгдсэн ховор эрдэнэ болжээ. Гэхдээ эв эеийг гаднаас хайх бус дотроо ойлголцож сахидгийг цэцэрлэгийн хүүхдүүд ч мэднэ. Шинээр байгуулагдсан ХҮН-ынхан даргаа томилох асуудалд маргалдаж, гаднын хүчтэй бүлэглэл манай нам руу халдаад байна хэмээн бусад руу буруугаа чихэж олны зэвүү, дургүй хоёрыг зэрэг хүргээд амжсан. Намынхаа дотоод асуудлыг шийдэж чадахгүй байж төрийг барих ч цаашаа шүү гэж олон нийт шүүмжилж байна лээ.
АН төр, засгийн эрх барьсан өнгөрсөн дөрвөн жилийн хугацаанд орон сууцны 8 хувийн зээлийг санаачлан 76 мянган айлыг, ипотекийн 5 хувийн зээлийн нэгдүгээр шатыг эхлүүлж 18 мянган өрх хамруулж, 2013-2015 онд нийт 2.5 сая ам.метр орон сууц шинээр ашиглалтад оруулж, малчны зээлийн жилийн хүү 29 хувь байсныг 10 болгож бууруулсан. Мөн зургаан аймгийг нийслэлтэй хатуу хучилттай замаар холбож 2700 орчим км зам барьж, нийслэлд уулзвар гарцыг өргөтгөж, шинэчилсэн гээд бүтээн байгуулалтын олон ажлыг хийж хэрэгжүүлсэн нь олны нүдэнд ил. Гэхдээ эрх баригчдын хоорондын зөрчил, фракц бүлэглэлийн тэмцэл л өөрсдийн гараар бүтээснээ нурааж байгаа гэдэгтэй хэн хүнгүй санал нийлдэг.
УИХ-ын дарга З.Энхболдын уриалсан “Фракцгүй Ардчилсан нам” лоозон биш ажил хэрэг болох цаг тулж. АН ардчиллаа нураах уу, эвлүүлэх үү гэдгийг ирэх өдрүүдэд харуулах байх. Тэдний эв нэгдлээс ирэх сонгуулийн дүн ч хамаарах юм.
Н.Энх