Тосон бумбын хамгаалалтын хилийн заагийг зааж өгөх ёстой
2016-04-11

УИХ-ын гишүүн Ц.Даваасүрэн энэ долоо хоногт байнгын хороо, чуулганы нэгдсэн хуралдаанаар хэлэлцэх хуулийн төслүүдэд  бие даагчдын байр суурийг илэрхийлэв.

 

Тэрбээр “Өмнөговь аймгийн Гурвантэс сумын нутаг дахь Тост, Тосон бумбын нурууг улсын хамгаалалтад авах хуулийн төслийн анхны хэлэлцүүлгийг чуулганы энэ долоо хоногийн хуралдаанаар хийнэ. Бие даагч гишүүд уг хуулийн төслийг дэмжиж байгаа. Харин хуулийг батлахдаа тусгай хамгаалалтад авах хилийн заагийг УИХ-аас тусгайлан зааж өгөх ёстой гэж үзэж байна. Үүнээс гадна Боловсролын тухай хуульд өөрчлөлт оруулах хуулийн төслийг дэмжиж байгаа.  Тус хуулийн төсөлд залуу малчны 6 настай хүүхдийг сургуульд оруулалгүй чөлөөлдөг байх заалт туссан юм. УИХ-ын гишүүдийг орон нутагт ажиллах үеэр хөдөөгийн иргэдээс энэ асуудлыг ихээр хөнддөг байна. Тиймээс хуулийн төслийг батлахдаа багшийн хувьсах зардлыг тусгах шаардлагатай хэмээлээ.

 

Энэ удаагийн хаврын чуулганаар Ерөнхийлөгчөөс өргөн мэдүүлсэн батлан хамгаалахын салбартай холбоотой багц хуулийн төслүүдийг хэлэлцэхээр төлөвлөсөн. Сонгуулийн уур амьсгал бүрэлдсэн энэ үед парламент бодитой хэлэлцэх болов уу гэдэгт тэдгээр гишүүд эргэлзэж байгаа аж. Тиймээс сонгуулийн дараа бүрдэх парламент хэлэлцэх нь зүйтэй. Одоогийн түвшинд зөвхөн тус хуулийн төслүүдийн хэлэлцэх эсэх хэлэлцүүлгийг хийх нь оновчтой гэв.

 

Түүнчлэн Монгол Улсын эдийн засаг, нийгмийг 2015 онд хөгжүүлэх үндсэн чиглэлийн биелэлтийг чуулганы энэ 7 хоногийн хуралдаанаар хэлэлцэхээр товд орж ирсэн. УИХ-ын гишүүн Ц.Даваасүрэн парламент үндсэн чиглэлийн биелэлтийг хангалтгүй хэлэлцэж ирсэн. Энэхүү баримт бичигт иргэд хяналт тавьдаг байх хэрэгтэй. Том төслүүд хөдөлж байна гэдэг боловч манай улсын эдийн засаг, нийгэмд өгөөжөө өгөхгүй байна. Өөрөөр хэлбэл эдийн засгийн бодит нөхцөл байдлыг энэ үеэр ярих ёстой хэмээсэн юм.

 

Н.Энх

Shuud.mn
Сонин хачин