Монголын улс төрийн ууган нам, 90 гаруй жилийн туршлагатай гэгддэг МАН улс төрд “өлгий”-нөөс ч гараагүйгээ харуулчихлаа. Тэдний санасан санаа, хийсэн ажил бүр нь улс төрд нялх хүүхдийн дайтай байгаа нь харамсалтай. Төрийн эрхийг дангаараа 70 жил барьж, ардчиллын дараа ч ихэвчилэн олонхи болж байсан МАН өөрийн гэх бодолгүй, үзэл баримтлал нь төлөвшөөгүй нь хийж буй үйлдэл бүрээс нь харагдах юм.

Өнгөрсөн дөрвөн жилд буйдантай жагсаал хийж, ирцээрээ бойкотолсноос өөр юу ч хийгээгүй МАН сонгуулийн өмнө яахаа мэдэхээ байчихлаа. 2012 оны сонгуулийн өмнө тэд яг ингэж байсан. Өөрсдөө олонхи байсан атлаа өрсөлдөгчөөсөө айхдаа нэрээ хүртэл сольж тоглосон. Үр дүнд нь намынхаа гишүүдийн талыг шахам алдаж, сонгуульд ялагдал хүлээсэн. Харин энэ удаад хөөгөөд явуулсан, өөрсдийнх нь ярьдгаар “дайсан”-аа урьж залж, гуйж гувшиж арчаагаа алдлаа. МАН-ын удирдлагад байгаа хэдэн нөхдөөс хавь илүү туршлагатай Н.Энхбаяр яалаа гэж тэдний урьснаар гүйгээд очих билээ. Шилний цаанаас чихэр долоолгочихоод далаар нь тавьчихлаа. МАН улс төрд жаахан ч гэсэн туршлагатай байсан бол Н.Энхбаярынхаа занг мэддэггүй юм гэхэд гадарлах байв. Гэтэл УИХ дахь МАН-ын бүлгийн дарга С.Бямбацогт “Эвлэж, нэгдэж сонгуульд оролцъё гэсэн боловч МАХН-хан тохирсноосоо буцаж МАНайхан дангаараа сонгуульд оролцохоор боллоо. Ярьсандаа байдаггүй хүмүүстэй ханилж болохгүй гэдгийг яс махандаа шингэтэл ойлголоо” гэж харамсаж суугаа нь улс төрийн хүрээнийхэнд инээдтэй л санагдаж байна.

Уг нь 90 гаруй настай МАН МАХН-ыг гуйж, гувших биш дангаараа сонгуульд оролцох бүрэн боломжтой баймаар. Гэвч тэд өрсөлдөгчөөсөө айхдаа арчаагаа алдаж элдвийг хийж байна. Гэтэл АН-ын генсек нь “Манай нам эвсэхийн зовлонг 10-аад жилийн өмнө туулаад даваад гарчихсан. Одоо бусад намтай эвсэх асуудал байхгүй” гэж даапаалж байна лээ.

Өөр намтай эвсэх нь эрх мэдээ хуваах, эргээд шантаажид орох эрсдэлтэйг МАН мэдээгүй, мунгинаж явааг нь харахад яах аргагүй “өлгий”-нөөсөө гараагүй байгааг харуулах юм.