УИХ-ын чуулганы өнөөдрийн хуралдаан ҮХЦ-ийн дүгнэлтийг хэлэлцүүлэх горимын саналыг гишүүн Ц.Нямдорж гаргав. Уг асуудлаар “Шударга ёс” эвсэл 5 хоногийн завсарлага авсан юм.  Гишүүн Ц.Нямдорж  тус эвслийг “хуралдахгүй байна. Тиймээс хугацаа шаардсан асуудлыг хэлэлцэх асуудлын жагсаалтад оруулж, хэлэлцье” гэж байлаа. Харин Шударга ёс эвслийн гишүүн  УИХ-ын гишүүн О.Баасанхүү “Жагсаалтын 28-ыг хүчингүй болгоё гэдэг хуулийн төслийг би санаачлаад дэмжигдээгүй. Анх энэ хуулийг АН, МАН хоёр улс төрийн хүчин санаачилсан.  Гэтэл миний эсрэг мэдээлэл гаргаад байх юм.  “Шударга ёс” эвслийн бүлгийн хурлын нууцыг дэлгэхэд би ҮХЦ-ийн дүгнэлтийг хэлэлцэхийг  хойшлуулахын эсрэг байсан юм. Гэхдээ  манай эвслийн бүлгийн олонхийн саналаар асуудал  явсан.  Манай эвслийн бүлэг 8 гишүүнтэй.  Эвслийн бүлгийн хуралдаанд  Ч.Улаан, З.Баянсэлэнгэ, Н.Батцэрэг зэрэг 5 гишүүн байсан. Бид сонгуулийн мандатын асуудлыг хэлэлцсэн.  Хэрвээ Ц.Нямдорж гишүүн тагнах, чагнах аппарат тавьчихаагүй бол манай бүлгийн асуудлыг ийм хурдан мэдмээргүй юм. Дээр нь Ерөнхий сайд Ч.Сайханбилэг УИХ-ын гишүүдэд худлаа яриад байх юм. Бид ЭМС-ын сайдын нэрийг дэвшүүлсэн. ЭМС-ын сайдын нэрийг УИХ-д өргөн барина гээд өнөөдрийг хүртэл оруулж ирээгүй байна” гэлээ. Харин Шударга ёс эвслийн бүлгийн дэд дарга З.Баянсэлэнгэ:

-Асуудал тавьчихаад алга болчихсон юм ердөө байхгүй. Бөгс өндийх хооронд араар битгий шоу бизнес хийж бай. “Шударга ёс” эвслийн бүлэг хуралдаагүй байна. Ажлын хэсэг дээр ажиллаж байгаа.  Бүлгийн дотоод асуудал руу хэн нэг хүн орж, асуудлыг өөрчлөх, хутган үймүүлж болохгүй. “Шударга ёс” эвслийн 8 гишүүн өнөөдрийг хүртэл байж байна. Бид 5 хоногийн завсарлага авсан. Энэ хугацаандаа асуудлаа шийднэ гэлээ.  Ингээд УИХ-ын дарга З.Энхболд “ Асуудлаа аль болох хурдан  хэлэлцэж оруулж ирмээр байна. Болж өгвөл маргааш асуудлаа дуусгаарай” гэдгийг анхааруулав.

Н.Энх